Gikahadlokan gihapon

Ang mga haring gangis sa Maguindanao -- ang mga Ampatuan -- gipanikop na ug naa na sa kamot sa balaud. Angay nang malipay ang ilang mga gipanaugdaug.

* * *

Malipay? Ang mga gipanaugdaug wala pa hingpit nga nalipay. Anaa pa gihapon ang kabalaka, ang kahadlok. Kurog pa gihapon sila makakita sa lapad nga nawong ni Andal Jr.

* * *

Matud pa sa usa ka biktima, dili sayon piangan ang mga Ampatuan. Nakapanggamut na kuno'g lawom ug halapad ang gahum ning maong gikahadlokang pamilya.

* * *

Mao say pagtuo ni Bise Mayor Esmael Mangudadatu kang kansang asawa ug duha ka igsuong babaye naapil sa mga nangamatay sa masaker nga nahitabo. Miuyon siya sa mga hunahuna nga kuyaw gihapon ang mga Ampatuan tungod sa impluwensiya niini sa katilingbang Pilipinhon.

* * *

Gani ang principal suspect sa masaker nga si Datu Unday Mayor Andal Ampatuan Jr. mipahiyumhiyom lang dihang gidala kini sa hearing adtong miaging Biyernes.

* * *

Morag nahisuwat sa nawong ang pagsalig nga makalingkawas gihapon siya ug ang iyang mga kabanay. Apan dihang gidala na siya balik sa iyang tangkal nga binirhan og puthaw, wa siya makalingkawas sa dukol sa mga sakop sa media kang kansang 30 ka kauban sa buhat naapil sa masaker.

* * *

TRIVIA -- Maayong buntag sa atong mga magbabasa diha sa mga simbahan atol sa misa de gallo ... Malipayong Pasko sa atong mga higala diha sa Ormoc City.