Biktima sa politika

Biktima sa political vendetta si Cebu Customs District Collector Ricardo “Boysie” Belmonte.

Bisan sa iyang maayong performance sa iyang pagka-district collector sa Bureau of Customs – Port of Cebu, ang atong nadunggan mao nga si Pres. Gloria Arroyo mismo ang mimando nga pahulipan si Belmonte sa katungdanan.

Grabe gyud tingale ang kalagot ni Arroyo sa dihang si Mayor Sonny Belmonte sa Quezon City, ang maguwang ni Collector Belmonte, mibali sa iyang suporta gikan sa partido administrasyon ngadto sa Liberal Party nga nagduso sa kandidatura nilang Senador Noynoy Aquino ug Mar Roxas pagka-presidente ug bise presidente sa nasud sa 2010 nga eleksiyon.

Sa miaging tuig, ang koleksiyon ni Collector Belmonte sa buhis sa mga imported nga kargamento nga miagi sa BOC-Cebu mi-surplus og P296.124 milyones sa P5 bilyones nga target niini.

Karong tuiga, Nobiyembre 12 pa lang, nakuha na ang tibuok tuig nga target collection sa BOC-Cebu alang sa 2009.

Base sa rekord, hangtod niadtong Disyembre 7, si Collector Belmonte nakakolekta na og P6,019.412 bilyones. Naka-surplus kini og P356.412 milyones sa P5.663 bilyones nga gi-assign nga target alang sa 2009.

Pero bisan pa niini, naka-ako ang mapanimaslanon nga presidente pagmando sa paghulip kang Collector Belmonte. Wala na lang panumbalinga sa Malacañang ang iyang collection performance.

Ihulip kang Belmonte ang district collector sa Port of Davao nga si Collector Ronnie Silvestre.

Apan adunay balita nga kaniadto pa kini si Collector Silvestre nangandoy nga mabalhin sa Port of Cebu.

Ngano kaha? Unsay naa sa Port of Cebu nga ganahan man kaayong madestino dinhi ang mga dagkong opisyal sa customs?

Paminawon pa nato ang pulso sa business community kun unsay ilang disposisyon kang Collector Silvestre. Kun wala sila'y nakitang labad sa pamunoan ni Collector Belmonte hinungdan sa kadako sa koleksiyon niini, maayo unta kun ingon niini usab ang mahitabo sa ihulip niya nga si Collector Silvestre.

* * *

Nabungog ang Malacañang sa mga pagsaway sa publiko hinungdan nga napugos kini sa paglibkas sa proklamasyon sa martial law sa Maguindanao.

Maayong mopakpak na lamang kita niining bag-ong kalambuan, kay gikuyawan ko nga basin og ilahos nila ang maong proklamasyon hangtod sa eleksiyon. Maayo na lang kay sa dihang ilang gi-testingan ang Maguindanao, tibuok nasud ang mitiyabaw.

Apan maayong bantayan nato kinsay maadunahan nilang mga opisyal sa Malacañang human sa proklamasyon sa martial law.

Kinsa kanilang mga sakop sa kabinete ni Pres. Arroyo ang grabe kaayong nakapangugat aron depensahan ang ilang proklamasyon pinaagi sa pasiatab nga aduna gyu'y “rebellion” nga nahitabo sa Maguindanao human gipamatay ang 57 ka mga tawo, apil ang 34 ka sakop sa media?

Sa ato na nga gituki sa miaging semana, duha lamang ang kinahanglan aron maproklamar ang martial law base sa 1987 nga Konstitusyon. Kini mao ang “invasion” ug “rebellion” nga bisan unsaon nato og balibali ang mga panghitabo, wala man gyu'y rebellion nga nahitabo.

Ang presensiya sa mga armas diha sa lugar sa mga Ampatuan dili mahimong ipamugos nga buhat sa mga rebelde.

Unang basehan, ang mga Ampatuan maoy mga gamhanang pamilya sa Maguindanao. Apan ang ilang pagkagamhanan naggumikan sa ilang pagka-opisyal sa gobyerno. Ang dakodako (patriarch) nila gobernador sa Maguindanao, pipila sa iyang mga anak mga mayor ug bise mayor, ug ang usa gobernador sa Autonomous Region in Muslim Mindanao.

Sa ato pa, sila'y mga opisyal sa gobyerno sa ilang lugar. Unsaon nila pagkahimong rebelde sa kaugalingon nilang balwarte?

Wala usab sila'y kasaysayan nga mi-alsa batok sa kagamhanang nasyonal. Wala usab sila pasanginli nga nagsuportahan sa mga rebeldeng organisasyon sa Mindanao.

Asa man ang rebellion?

Ang mga kritiko sa kasamtangang pamunoan, ilabi na si Senador Mar Roxas, kanunay’ng mibalikbalik nga dakong sayop ang pag-imposar sa martial law sa Maguindanao. Sakto na kaayo kadtong state of emergency.

Mitumaw hinuon ang pagduda nga ang martial law maka-justify sa pagpasaka og mga kasong rebellion sa mga Ampatuan, gawas kang Mayor Andal Ampatuan Jr. nga maoy migawas nga utok sa pagpapatay sa 57 ka mga tawo sa Shariff Aguak.

Kun rebellion lamang ang kasong ipasaka sa mga Ampatuan, mahimo silang maka-piyansa. Kun makonbikto, mahimo silang maka-aplay og amnesty tungod kay ang rebellion usa ka political crime.

Gani, mahimo silang maka-aplay og asylum ngadto sa ubang Islamic countries kun gustohon kay lagi ang kasong rebellion usa ka politikanhong krimen.

Apan, balikon nato, kanus-a man nag-rebelde ang mga Ampatuan?

* * *

Ingon na niini ka-walay klaro ang administrasyon. Unya, naka-ako pa gyud og file sa iyang certificate of candidacy si Pres. Arroyo pagka-kongresista sa ikatulong distrito sa Pampanga.

Klaro gyud kaayong gusto lamang niini nga mogamot sa gahum, dili gustong manaog. Naanad nga pirme lang siyang gamhanan ug maguol kun mapasa ngadto sa laing lider ang iyang gahum.

Mao tingale kini ang hinungdan nga mipilit ang popularity rating ni Gilbert “Gibo” Teodoro. Samtang misulbong sa survey si Senador Noynoy Aquino, nagpabilin si Gibo sa ulahi.

Tinuod man gyud nga usa ka “bagahe” ni Gibo si Pres. Arroyo. Klaro man kaayong hadlok si Arroyo nga gukdon sa iyang mga sala sa mga Pilipino kun mawala na sa gahum.

Sa kadaghan sa iyang mga sala – gikan sa Hello Garci! controversy ngadto sa ZTE-broadband deal – nga paninglonon sa mga Pilipino, si Gibo nga nakadawat sa iyang bendisyon klarong nakahigot sa pamunoan ug posibleng maoy modupa sa higayon unya nga paninglan na si Arroyo sa katawhang Pilipino.

Luoy lang si Gibo nganong sa administrasyon pa ni Arroyo siya mipilit. Usik iyang naantigohan.