Ang ilot ug ang hangol

Pipila ka mga negosyante dinhi sa Sugbo ang miapil na sa panawagan sa ilang mga kaubanan didto sa kaulohan kinsa miduso na og kaso sa hukmanan aron pagpangutana sa legalidad sa gipatuman sa Malakanyang nga Executive Order 839 nga nagdili sa mga magpapatigayon og lana didto sa kaulohan sa pagpaumento sa prisyo sa ilang mga produktong petrolyo sa mga dapit nga giigo sa katalagman.

Ang mga magpapatigayon miangal sa maong kamandoan sa Malakanyang tungod kay naalkanse na sila og binilyon. Ilang gihulga ang kagamhanan nga magkuwang ang lana sa umaabot nga mga adlaw kay mohunong una sila sa pag-angkat og lana didto sa gawas sa nasud.

Mga hangol gyod ning mga magpapatigayon og lana ug way mga kasing-kasing, suwapang ug botboton. Kinsa man intawon ang ilang patoohon nga naalkanse na sila og binilyon sa ilang negosyo nga ang E.O. 839 gipatuman man lang sa mga dapit didto sa Luzon nga naigo sa bagyong Ondoy ug Pepeng. Ang E.O. 839 wa ipatuman sa Visayas ug Mindanao ingon man sa mga dapit didto sa Luzon nga wa maigo sa bagyo. Gani dinhi sa Visayas misaka man ang prisyo sa ilang produktong petrolyo. Busa ang lugi sa ilang ginansya didto sa kaulohan gibawi ra dinhi sa Visayas ug didto sa Mindanao.

Kun tinood man ugaling nga nalugi ang mga magpapatigayon og lana nganong pabilin man silang nagmagahi sa pag-abli sa libro sa ilang kita ngadto sa atong gobyerno?

Kini pong E.O. 839 ilot ra pod ni sa Malakanyang ngadto sa katawhan nga nagsukarap na sa ka bug-at sa kalisod nga iyang gipas-an. Giulo-ulohan lang ni pangulong Gloria Macapagal Arroyo ning E.O. 839 ang katawhan nga nalubong na sa tubig ug lapok sa kalisod. Kun gusto man gyod ugaling sa Malakanyang nga sumpoon ang abuso nga gihimo sa mga magpapatigayon og lana, nganong di na man lang hunongon niini ang pagpatuman sa Oil Deregulation Law? Kun nahimo ni pangulong Arroyo ang pagpahunong ug pagwagtang sa silot sa kamatayon sa dihang una siyang milingkod sa gahom, nganong di man kini niya mahimo sa Oil Deregulation Law? Tungod ba kay siya ang inahan niining maong balaod sa dihang Senador pa siya? Ning naghinapos niyang termino mohunong na unta ang pangulo sa pagpaka aron-ingnon!