"Silent Night" sa udtong tutok

Naa nay mga radio station nga nagsugod na'g patukar og Christmas carols. OK kaayo ni kay mapukaw ang atong Christmas spirit kun diwa sa Kapaskohan.

* * *

Ang dili OK kaayo mao ang mga badlongong batan-on nga magsugod na'g panaygon ning sayo pa. Unya bugalbugalan ang gipanaygonan nga dili makaabi-abi nila.

* * *

Usa ka biktima niining mga badlongong mananaygon -- mga batan-ong estambay kini nga maninguhang makasapi aron dunay ikapalit og ilimnon nga makahubog -- mao ang usa ka tag-iya'g sari-sari store sa Mandaue apan diha nagpuyo sa may Labangon.

* * *

Nanaygon kini sila alas 12 sa udtong tutok. "Silent Night" ang gikanta bisan naglagiting ang init sa adlaw.

* * *

Wa sila matagad kay ang tag-iya sa panimalay nagtubag pa sa overseas phone call gikan sa iyang anak sa gawas. Gikasuko kini sa mga noonday caroler.

* * *

Namauli ang mga batan-on apan nibalik pagka-gabii. Wa na manaygon kundili mipauwan og bato sa bay sa negosyante. Gihapak pa og kahoy ang awto niini. "Wa pa ra ba nako maimpas ang bayranan niini," matud sa negosyante. "Bisan used car kini pero hinaguang kuwarta ang gipalit ini."

* * *

Gihilom ra sa biktima ang gibuhat sa mga mananaygon kay mahadlok nga mahibawo ang iyang anak lalaki nga mas grabe pa kuno ka maldito adtong nagpauwan kaniya'g bato. Ang maong anak tua sa Mindanao kay sundawo.