Makalansar pa ba si Erap?

Mipadayag na gyud si kanhi Presidente Joseph “Erap” Estrada sa iyang plano nga molansar pag-usab pagka presidente sa nasud. Matud pa niya, wala kunoy legal nga babag sa iyang kandidatura. Busa karon atong susihon ang pipila ka mga probisyon sa balaod nga adunay kalabutan sa diskwalipikasyon pagka presidente.

Ang kwalipakasyon pagka Presidente anaa gilatid sa Batakang Balaod. Matod pa sa Art. VII niini, makalansar ang usa ka tawo isip presidente kun nag-edad na kini’g 40 anyos; nakapuyo sa Pilipinas sa dili momenos pulo ka tuig gikan sa eleksyon nga daganan niya; rehistradong botante; puro nga Pilipino; ug makamaong mobasa ug mosulat.

Wala na gani giingon sa balaod nga kinahanglang masabtan usab sa kandidato kun unsay iyang gibasa o gisulat, basta nga makabasa ug makasulat. Dili kini layo sa abilidad sa akong pag-umangkon nga otso anyos, kay maayong laki na man mobasa ug mosulat. Hinuon di gyud nato siguro kun nakasabot ba siya sa iyang gibasa. Apan duna bay kalainan kini sa uban tang naghupot sa katungdanan?

Ang Omnibus Election Code miingon nga dili mahimong mohupot og katungdanan ang usa ka tawo nga wala sa insaktong panimuot; o nakonbikto sa krimen nga rebelyon, o sa salaod nga ang pagka-priso moabot sa disi-otso ka bulan, o ba kaha sa krimen nga naglambigit sa moral o integridad sa usa ka tawo, GAWAS KUN NAHATAGAN KINI OG PARDON O AMNESTIYA SA MAONG KRIMEN.

Kining maong diskwalipikasyon mawagtang pagkahuman sa lima ka tuig gikan sa pagserbisyo sa sentensya.

Ang kasong Plunder nga maoy nakonbiktohan ni Erap, usa ka kaso nga naglambigit sa moralidad ug integridad. Apan gihatagan siya’g pardon ni Presidente Arroyo ug mao nga wala na niya serbisyohi ang iyang pagka-konbikto.

Kining kakulang sa panimuot, kinahanglan nga adunay doktor nga magmatuod niini. Bisan pasanginlan ang usa ka kandidato o opisyal nga magsuol-suol kun takdol ang bulan, o ba kaha nga na “brain damage” kini, dili kini igo nga maka-disqualify sa maong kandidato o opisyal. Sama sa nahitabo sa lain nga opisyal, madugay ug madali, maanad ra ang mga tawo nga maminaw kun modiskurso kini nga mag-aso-aso inig timpo sa tingsuol.

Busa, molahos gyud kuno si Erap sa iyang paglansar. Tingali, nakahibalo sab siya kun asa siyang dapita sa survey sa mga molansaray pagka presidente. Busa kun naa na siya’y ideya nga subidahon ang iyang pagdaug, nganong iya man kining gi-desisyonan? Matud pa niya kaniadto, kun dili kuno magka-uyon ang oposisyon, mapugos siya paglansar. Karon nga daghang wala modayon paglansar sa pagka presidente dihang miitsa sa iyang kalo si Noynoy Aquino, nganong motahan pa man gyud siya sa iyang kaugalingon bisan adunay posibilidad nga makasugat siya’g daghang kaso sa mao niyang desisyon?

Kinsa man o unsa man gyud kahang grupoha ang makabentaha ug makapabor sa pagka-buak sa mga botos tungod sa paglansar ni Estrada?

Matod pa kaniadto sa komedyanteng si Dolphy, dihang gigalgal kini nga palansaron usab tungod sa popularidad niini sa masa, nga “hindi problema ang pagtakbo, ang problema, paano kung manalo?”

Mao gyud!

* * *

Alang sa inyong mga panahom, palihug email sa [email protected]. Daghang salamat.