Inhustisya

Gibuhian ni maghuhukom Soliver Peras ang kaso ni Ruben Ecleo Jr. tungod sa iyang pagpangluod sa mga sakop sa media nga nagsunod sa storya sa kaso. Wa ikasabot sa maghuhukom ang mga sakop sa media nga misuki sa higpit nga patakaran nga iyang gipatuman sa pagkuha og balita sa kaso. Tungod kay gisaway sa media ang iyang estilo sa paghupot sa kaso ni Ecleo, murag batang gamay si Peras kay nangluod. Pagka mabaw ba diay og lubot ning maghuhukom Peras.

Dakong inhustisya ngadto sa mga Bacolod ug Ecleo ang pagbuhi sa maghuhukom sa kasong Ecleo tungod lang kay wa ikasabot niini ang mga sakop sa media nga gustong mokuha og balita sa husay sa kaso.

Dili makiangayon ngadto sa mga Bacolod ug ni Ecleo ang gihimo sa maghuhukom. Binata ang iyang nakab-ot nga hukom. Dili angayang idamay ang kaso tungod lang kay wa ikasabot niini ang mga sakop sa media nga wa makauyon sa iyang patakaran nga gipatuman. Busa angayan lamang ikonsiderar niini ang iyang pagbiya o pagbuhi sa kaso ni Ecleo.  

Dili sa ingon nga akong gidiktahan ang maghuhukom kay si kinsa man lang intawon ko pero ang angayan gyod untang himuon sa maghuhukom mao ang pagtutok ra gayod sa kaso di kay magpadala sa mga pagsaway sa media kun mao may gitoohan niini nga makaayo ang mga patakaran nga iyang gipatuman. 

* * *

Aduna man tooy punto ang maghuhukom sa hugot nga seguridad nga gipatuman niini diha sa iyang sala samtang gihusay ang kaso ni Ruben Ecleo Jr. apan sobra ra usab kaayo kini ngadto sa mga sakop sa media. Ang pagpasumiter sa maghuhukom og hulagway sa mga reporter gawas sa company ID nga nagbitay nang daan sa ilang liog sobra ra. Murag nagtoo si Peras niini nga mga terorista ang mga sakop sa media.

 Ang maghuhukom dapat motratar sa media isip kaabag ug katambayayong sa pagbugtaw sa kamatuoran ug kaangayan ning kasong Ecleo Jr. ug dili sila itratar nga balabag.

* * *

Ako diay nga pahalipayan ang akong inahan nga nagsaulog sa iyang adlaw’ng natawhan kagahapong adlawa Oktobre 28, 2009. Happy Birthday Mother.