EDITORYAL - Nagkaalegre nasad ang Colon

Nag-anam anam na og pamalik ang mga shopper diha sa Colon ug nibalik nasab ang kaalegre sa maong kalye.

Di ba nga diha toy panahon nga medyo nimingaw ang Colon gumikan sa pagtumaw sa mga higanteng mall sa uptown area.

Karon daghan nasab ang manulod sa mga tindahan sa karaang kalye ug gani naa namay mga bag-o nga establisamento nga gipanukod sa maong dapit.

Kinahanglan gayud nga buhion ug palambuon pa gyud ang Colon kay mao kini ang giila sa atong kasaysayan nga labing unang business street sa nasud.

Ang Task Force Colon nga gimugna sa Cebu City Police Office kang kansang tumong ug tinguha mao ang pagpatunhay sa kalinaw ug kahusay sa maong dan nakatabang og dako sa pagdani og balik sa mga shopper sa Colon.