Tungod kay dili pa sila mga kandidato, gitugotan sila'g pangampanya, apan dili maisip nga nangampanya tungod kay dili pa sila kandidato

Makalibog, apan mao man tingali kini ang balaud. Maoy hinungdan nga sige na sila’g pangampanya bisan kun dili pa sila mga kandidato.Ug tungod kay dili sila kandidato, ug wala pa ang official campaign period, wala pa ang filing sa certificate of candidacy, dili maisip nga nag-early campaigning sila. 

Ilang justification: Nag-information drive lang sila, wala mangampanya. Ug maoy hinungdan nga gipasagdan lang sila sa Comelec. Sa laktud nga pagkasulti, gitugotan diay ang early campaigning, basta di lang mangampanya, ug ang mangampanya dili kanidato.

Sa ato pa sila si Villar, Chiz, Noynoy, Erap, Puno, Enrile, ug kinsa pa nang uban diha, dili mga kandidato. Kun dili pangampanya ang ilang gibuhat, lakip na ang pagsuroy-suroy sa nagkalainlaing dapit sa nasud, nag-unsa man diay ni sila?

Kun ang ilang gigasto sa mga commercial ila pang gi-donate sa mga biktima ni Ondoy ug Pepeng, daghan pa ang malipay ug makapahimuot pa sa Mahal nga Birhen ug sa Ginoo. Kining ilang gigasto sa mga commercial, ang mga patigayon ra sa radyo ug telebisyon ang nalipay. Lagmit ang lungsod giluod na.

Ang Korte Suprema mi-unseat sa usa ka Mayor for premature campaigning.Unsa man ning premature campaigning nga gibuhat sa Mayor? Nag-motorcade siya paingon sa buhatan sa Comelec pag-file niya sa certificate of candidacy.

Sa 1960, si Justice Enrique Fernando namahayag nga ang “:prolonged political campaign (brought) in their wake serious evils (like) ever increasing cost of seeking public office.” Sa ato pa, kining early campaigning makadugang sa gasto sa buot magpapili, ug ang mga buotan unta nga buot mualagad sa lungsod, di na lang magpatuga-toga’g lansar gumikan sa ka-mahal sa pangampanya.

Sa 1990, si Justice Florentino Feliciano miingon nga “candidates with deep pockets could dominate the airways with expensive ads.” Mao kini ang nahitabo karon. Layo pa kaayo ang eleksyon, wala pa ang campaign period, ug kadtong daghan kaayo og kwarta, mao karon ang nag-dominar sa radyo ug telebisyon, uban sa pagtuo nga madala gihapon ang lungsod sa ilang pag-posing-posing sa telebisyon. 

Ato silang pahinumduman nga lahi na karon ang panahon. Na-edukar na ang mga pumipili, nagka-wise na ang mga botante, nasayod na sila sa matuod nga isyo. Infact, ang uban kanila, dugay nang nakahukom kinsay ilang pilion pagka-Presidente. Maoy akong gikahadlokan nga kining mga early campaigning ma-overkill ug ma-negative na hinoon ang epekto niini ngadto sa katawhan. Dimalas lang. Daku nag gasto – pilde pa.