Ang abuso sa mga airlines

Panahon na seguro nga tutokan sa ahensiya sa atong kagamhanan kining kalaki sa mga airline companies nga grabe kaayo makapahimulos sa panahon. Ambot unsay patakaran nga gisubay niini nila mahitungod sa ilang pletihan nga hapit man kada minuto lain-lain ang ilang pletihan.

Unya kun magpausab ka sa skedyol sa imong biyahi pabayron ka og sobra pa sa katunga sa imong pletihan kanang gitawag nilag re-booking fee. Gawas niana, pabayron pa gyod ka og no show bisan kun nagpausab ka sa imong skedyol sa wala pa ang imong biyahi. Di pa na mao. Ang ngilngig gyod kay bisan pariha ra ang inyong lingkoranan lain-lain ang presyo. Pabayron ka nila sa ilang gitawag nga difference. Samot na gyod kun sakay kaayo magpapresyo upod sila pagmaayo. Di upod magka pariha ang libre nga gibug-aton sa inyong bagahi. Mao ni ang naandan nilang practice. Busa kun mosakay kaman gani og eroplano kinahanglan nga aduna kay daghang pundong kwarta kay kun wala magpaguyod ka na lang.

Ngano kaha nga mao ni ilang gihimo? Nagsalig ba ang mga airline companies nga dili mahimong baktason nato ang kawanangan? Ibutang ta nga aduna sila'y gisubay nga patakaran ug ang maong patakaran gitugot sa atong kagamhanan, ang akong pangotana makiangayon ba kini ngadto sa mga sumasakay?

Dugay na kining gihimo sa mga airline companies ngadto sa ilang mga sumasakay busa angayan segurong tan-awon sa atong kagamhanan kining maong abuso ug pahimulos. Kun kaniadto wa ni nila tagda ug gipasagdan lang tungod sa pagtoo nga pribilihiyo ang pagsakay og eroplano, malooy tawon mo, dili tanang mosakay og eroplano ang gusto lang gyod nga mopahimulos ning maong pribilihiyo. Dili lang upod mga dato ang gustong mosakay og eroplano, mosakay upod tawon ming mga kabus.