Gitinuod gyud sa Kapitolyo ang dugay na nilang bahad nga mosang-at og kaso batok ni Mayor Tomas Osmeña ug sa mga sakop sa konseho tungod sa pagsulod niini og joint venture agreement uban sa Filinvest Land Incorporated alang sa pagbaligya ug pag-develop sa kapin sa 50 hektaryas nga luna diha sa South Reclamation Properties.
Matud ni Gobernador Gwendolyn Garcia nga “illegal” ang gihimo sa mga opisyal sa dakbayan pinangulohan ni Osmeña ug ni Bise Mayor Michael Rama tungod kay nabintahaan kuno ang gobyerno sa maong joint venture agreement.
Unang gikwestiyon sa gobernador kun mamahimo ba nga ang pagbaligya sa 10.6 hektaryas nga luna diha sa SRP ilakip sa JVA alang sa pag-develop sa FLI sa laing 40 hektaryas.
Ang baruganan ni Garcia mao nga dili angayang usahon ang transaksiyon sanglit ang pagbaligya angayang ipaagi sa tukmang proseso nga mao ang pagpahigayon og bidding. Samtang sa pag-develop sa 40 hektaryas sumala pa ni Garcia nga ang mga termino didto sa JVA disbintaha kaayo alang sa dakbayan sa Sugbo. Dunay punto ang gobernador apan kwestiyonable ang iyang motibo sa pagpasaka og kaso. Unang rason nganong kwestiyonable tungod kay nasuko ang lalawigan nga gi-disqualify sila paghagit sa unsolicited proposal sa FLI.
Ikaduha, kwestiyonable ang timing sa pagpasaka sa kaso tungod kay tataw nga gihimo nila kini aron matabunan ang kaugalingon nilang kontrobersiya pagpalit og luna nga anaa ilawom sa dagat ug katunggan.
Dili ba dugay naman kaayo ang bahad sa Kapitolyo nga mokiha sa dakbayan, apan nganong karon naman lang nila kini gihimo nga nagkapuliki sila’g sagang sa grabing pagsaway sa publiko ug sa imbistigasyon sa Ombudsman sa pagpalit nila sa 24.7 hektaryas nga luna sa mga Balili diha sa Tinaan, Naga?
Tataw nga “squid tactic” ang gihimo sa Kapitolyo aron tabunan ang isyu sa Balili.
Kun nagtuo si Garcia nga matakli ang atensiyon sa publiko gikan sa kwestiyonable nga Balili transaction ngadto sa kasong iyang gisang-at nasayop siya. Kini tungod kay kun duna may alkansi ang dakbayan sa maong joint venture agreement mas dako ang alkansi sa gobyerno sa Balili property.
Wala say nawong si Garcia nga manulisok sa dakbayan tungod kay utro siyang angayang tulisokon sa pagpalit og yuta nga anaa ilawom sa dagat ug sa iyang padayong pag-insister nga dayonon sa probinsiya ang pagpalit bisan siya sayod na sa tinud-anay nga kahimtang sa luna.
Dili kaha mas maayo alang sa gobernador nga manilhig una sa iyang nataran sa dili pa manghilabot sa tugkaran sa iyang silingan?
* * *