"Mutya ka Balili"
Sama sa nangagi, sadya ug mabulokon ang pagtak-op karong tuiga sa kasaulogan sa Cebu Press Freedom Week. Salamat sa mga haligi sa industriya sa media dinhi sa Sugbo sa talagsa-on nga kahigayonan nga ilang gihatag ngadto sa mga reporters nga aktibong makasalmot sa maong kasaulogan.
Sulod na sa pipila ka tuig ang closing program sa maong kalihukan maoy nahimong agi-anan aron hiniusang mapakita sa mga reporters ang ilang mga talento dili lang sa pagtagik og balita kun dili lakip ang paghatag og kinabuhi sa mga nagbagang isyu ug kontrobersiya sa ilang beat.
Ang indigay sa mga pasundayag tali sa kahugpongan sa mga reporters dinhi sa Sugbo maoy nahimong sentro sa pagtak-op sa usa ka semana nga selebrasyon didto sa bag-o ug hamugaway nga Mariners Court.
Ang tema karong tuiga sa mga pasundayag sama sa "music video" ug sa gihapon ang Defense PNP Press Corp kon DEPP mao gihapon ang midaog sa unang ganti pinaagi sa ilang MTV version sa "Bakit Ngayon Ka Lang."
Gilangkat sab sa Media in Cebu South kon MICS, bag-ong membro sa Cebu Federation of Beat Journalists kon CFBJ ang ikaduhang ganti pinaagi sa makalingaw nilang version sa awit nga "Mutya ka Baleleng" apan ang mga lyrics niini gihulipan sa mga bugal-bugal sa kontrobersiyal nga Balili transaction tali sa Kapitolyo ug sa Balili estate.
Ang grupo sa mga photographers ug cameramen kon LENS ang mikompleto sa top three pinaagi sa ilang version sa "sister act" nga nagsentro sab sa pagpakita sa kontrobersiya nga miigo sa mga monghe diha sa Lindogon Shrine sa Simala.
Ang version sa akong higala nga si Marlon Bellita sa dyAB sa awit nga Mutya ka Baleleng maoy nakalingaw pag-ayo nako. Di ko ka sag-ulo sa iyang mga lyrics apan tugoti ko'ng hatagan ko kamo og idiya sa iyang awit pinaagi niini:
Mutya ka balili sa katonggan, timgas ang tubig gamay ray yuta. Sa Kapitolyo gikagubtan kay way usa'ng miangkon nga nasayod.
Ang gobernador mibasol ni Bokal Juan Bolo kay sa Kapitolyo siya'y nangahente. Si Bolo misumbalik sa Gobernador kay siya igo ra diay'ng gisugo.
Gobernador mimugna og komitiba, sa transaksiyon sila nagpakisusi. Ang hunta probinsiyal wa magpaawahi sa imbistigasyon sila pod miapil.
Nitiyabaw si Bolo kay sa pagbasol siya ray nag-solo. Bisan sa kagubot gobernador gustong kontrata ipadayon. Amahan ug anak nagkauyon nga Balili transaksiyon ipadayon. Nobody, nobody knows kinsay nabulahan.
Kini maoy pipila sa mga linya sa awit nga nipilit sa akong panumduman nga sigurado ko nga ang tanang nitambong sa programa lakip sa mga di mahikalimot.
* * *
- Latest
- Trending
