Political will

Tan-aw nako wala g’yoy katapusan kining problema sa pagpataka lang og labay sa mga basura sa lainlaing dapit dinhi sa atong dakbayan, ug bisan diha sa ubang mga dapit.

Ang hinungdan niini mao ang batasan sa katawhan nga walay pagpakabana nga malimpyo ang ilang palibot, ug ikaduha mao ang kuwang sa pagpakabana sa atong mga elective officials.

Kun gipatuman pa lang sa atong mga opisyal ang mga balaud, sigurado ko nga mahadlok g’yod ang katawhan nga mohimo’g kalapasan. Apan unsaon nga mahadlok man sila kay basin og dili na makadaug sa sunod eleksyon.

Sa press conference kaniadtong Biyernes, gisukit-sukit g’yod nako si Acting Mayor Michael Rama sa pagtug-an sa tinuoray’ng gamot niining maong problema, apan mapanagan-on kaayo si Rama nga motug-an.

Giawhag lang hinuon niya ang mga barangay officials nga dili g’yod mohunong sa pagpanglimpyo sa ilang palibot sama sa gihimo kagahapon nga Coastal ug River clean-up nga mitigum na usab og pipila ka toneladang mga sagbot.

Ang tukma g’yod unta nga himoon sa mga opisyal mao ang pagpatuman sa balaud sa walay kukahadlok nga dili ka na makadaug sa umaabot nga eleksyon.

Unsaon man god, pipila ra sa mga politiko ang duna niining maong baruganan kay mipasuwabi kanila ang kahakog sa pag-angkon sa gahum kay nagtinguha sila nga mapabilin sa pwesto.

Mao bitaw kana nga gidayeg g’yod nako si Bayani Fernando kay dihang mayor pa siya kaniadto ug karon nga chairman siya sa Metro Manila Development Authority, makita nimo nga duna g’yod siya’y “political will.”

Kini maoy kuwang sa atong mga opisyal. Apan may igo pa nga panahon sa pag-usab kay dugay pa nga matapos ang inyong termino nga mga barangay officials, gawas sa mga mayor ug konsehal, gobernador ug provincial board members.

* * *

 Nagpahibalo ang kadagkoan sa kapolisan ngadto sa mga tawo nga naghupot karon og mga armas nga walay lisensya nga duna sila’y katapusang higayon nga mopalisensya sa ilang armas sa sayon ra kaayo nga paagi hangtud na lang sa Oktobre 31.

Adto lang mo pangutana sa Firearms and Explosives Section diha sa Police Regional Office-7 sa mga detalyi niini. Ayaw na lang pag-text nako kay mahurot ang limitado tawon nako nga “load” sa kadaghan nakong tubagon.

Dili na kamo pangutan-on sa kapolisan kun diin gikan ang armas nga buot ninyo palisensyahan.

Nindot man god nga lisensyado ang inyong armas kay wala ka g’yoy kahadlok nga maghupot niini. Tuohi na lang ko ninyo.

* * *

Karong buntag diay, pormal nga buksan sa mga sakop sa media dinhi sa Sugbo – mga sakop sa print ug broadcast media – ang pagsaulog sa Press Freedom Week.

Anha kita magkita sa Ayala Business Center atubangan sa main entrance sa Gaisano Metro-Ayala. Dayon mag-parade kita paingon sa SM City diin adto himoa ang Santos nga Misa, dayon ang mga gihan-ay na nga kalihukan.

Dayon ugma sa gabii, maoy unang media gathering nga pasiugdahan ni Jonji Gonzales ug sa iyang mga sponsors sama sa Cebu Energy Development Corporation ug uban pa.

Ang culmination activity pagahimoon usab sa Sabado. Matag adlaw, dunay mga gihan-ay na nga kalihukan, usa niini ang akong tambongan sama sa lectures kabahin sa election matters.

Kagahapon usab, mitambong ko og susama nga kalihukan nga gipasiugdahan sa Kapisanan ng mga Brodkaster ng Pilipinas (KBP). Unya sa Oktobre 19, 20 ug 21, motambong usab ko og susama nga seminar sa election-related matters adto sa Cagayan de Oro nga ipahigayon sa Philippine Press Institute.