Krus ni Noynoy

Kung kanus-a nibuhos ang suporta sa kandidatura ni Senador Noynoy Aquino pagka-presidente sa 2010 nga piniliay, mao ‘sab ang pagsulbong sa mga isyu nga gisangitan sa anak sa kanhi senador ug presidente sa nasud. Kung kanus-a nagtuo ang mayoriya sa katawhan nga si Noynoy na ang labing haum sa pwesto, mao ‘sab ang paggawas sa kontrobersiya batok niya. Si Aquino diay ang co-author sa usa sa kusganong gibabagan nga balaudnon—ang Reproductive Health Bill. Human mogawas nga numero uno sa labing uwahing survey sa Social Weather Station, karon doble ang pagkayod sa grupo sa senador aron pagkabig sa suporta sa mga tawo nga nadismaya sa maong kamatuoran.

Usa sa mga nadismaya ang arsobispo sa Sugbo nga si Ricardo Cardinal Vidal nga una nang nipadayag og kalipay nga nidagan si senador Aquino nga presidente. Apan nakugang nalang ang lider sa simbahang katoliko sa Sugbo nga usa diay sa mga nagpaluyo sa kontrobersyal nga balaudnon ang senador. Karon, giplanohan nang ilakip ang panga’n sa senador sa mga politiko sa nasud nga ikampanya nga di’ pabotohan sa sunod nga eleksyon. Makapahugno alang sa simbahan ang maong kamatuoran labi pa nga gikan sa pamilya nga relihiyoso si Aquino ug ang pagsuporta sa gitawag sa simbahan nga anti-life bill ang usa sa labing imposibleng lakang unta nga mahimo sa usa ka Noynoy.

Apan unsa ba ka lanog ug ka dako ang suporta sa mga ordinaryong tawo sa baruganan sa simbahan? Su’d sa dugay nang katuigan, managlahi kanunay ang pag-tratar sa mga tawo sa mga balaod sa simbahan sa natad sa politika sa nasud. Sa maong paagi, di’ kaayo angayan nga mabalaka si Noynoy tungod kay wa’ pa mahitabo nga may gidusong kandidato ang simbahan. Sama ra nga wa’ pa mahitabo nga nagmalampuson ang simbahan sa pagkampanya nga dili pabotaran ang mga tawo nga nipaluyo sa Reproductive Health Bill. Bisan sa kasaba sa mga kongresista sa Sugbo sa ilang baruganan sa maong balaudnon sama sa kasaba sa kampanya sa simbahan nga ibasura ang balaudnon lakip na ang mga opisyal sa gobyerno nga nisuporta sa maong lakang, nidaog gihapon sa pwesto ang maong mga kongresista ug nagpabilin gihapon sila sa pwesto.

Andam hinuon si Cardinal Vidal sa pakighimamat ni Noynoy aron hisgutan unsa ka lawom ang iyang interes ug iyang pagsuporta sa maong balaudnon. Kun sa mga miaging tuig ang pagbabag sa balaudnon ang gihimo sa simbahan, karon ang pagpangayo na gyud sa mga politiko sa ilang tagsa-tagsa ka baruganan sa kontrobersiyal nga balaudnon ang gipangayo. Sa maong paagi, mas mapugos ang mga politiko nga ihiklin lang una ang ilang personal nga interes aron sundon ang tumong sa simbahan. Ang eleksyon sunod tuig ang nakita sa simbahan nga proseso aron mapugos ang mga politiko nga mabasura ang maong balaudnon. Apan pila lang ba kanila ang mosunod sa mando sa simbahan? Pila lang ba sa mga opisyal ang mahadlok sa sulti sa kadagkuan sa simbahan kun mismong ordinaryong mando sama sa di’ pagpangabit, di’ pagpangawat ug di’ pagpatay wa’ gisunod sa pipila ka mga opisyal sa gobyerno.

Dako pa ang labangon sa kandidatura sa usa ka Noynoy Aquino. Ug ang krus nga karon gipahinumdum sa simbahan kaniya, usa lang sa daghan pang krus nga moabot sa iyang kandidatura. Karon, nag-una siya sa survey ug ang pagpabilin sa maong pwesto ang labing dakong hagit nga iyang himuon lakip na sa partidong Liberal. Kung nahimo positibong aspeto ang iyang igsuon nga si Kris sa iyang kandidatura, posibleng usa ‘sab ni sa mamahimo niyang krus tungod sa usahay wa’y klarong ipanulti sa iyang igsuon. Kun ang pagka-relihiyoso sa iyang pamilya ang labing dakong puntos ni Noynoy posibleng mahimo ‘sab ni krus tungod kay siguradong bantayan sa katawhan ug sa simbahan ang matag lakang nga iyang himuon. Kun ang pagkalimpyo sa iyang dungog gikan sa isyu sa korapsyon ug pagpangawkaw ang labing dakong puntos sa senador, posibleng mamahimo ‘sab ni niyang krus kun o galing mabutang na sa pwesto tungod kay kini matag gamay nga sayop unya sa iyang pamunuan, dako nang kasaypanan alang sa uban. Apan matag usa adunay krus nga gipas-an. Ang nakalahi lang kang Noynoy, siya ang labing limpyo nga kandidato nga atong nahibaw-an sa pagkakaron itandi sa ubang nag-ambisyon ‘sab sa pwesto. Ug kini ang usa sa labing bug-at nga krus nga iyang pas-anon gikan karon hangtud sa adlaw sa piniliay.

Email: [email protected]