Korapsyon, hadlang sa pag-unlad ng bansa

PINAG-USAPAN namin ng aking panganay na anak na si Senate President Pro Tempore Jinggoy Ejercito Estrada, chairman ng Senate Committee on Labor, Employ­ment and Human Resources Development at ng joint Congressional Oversight Committee on Labor and Employment, ang bagong 2009-2010 Global Competitiveness Index report ng World Economic Forum (WEF).

Ang Index ay ranking ng 133 mga bansa kung ito ba ay kaaya-ayang pagtayuan ng negosyo base sa mga opisyal na datos at sa pananaw ng 13,000 mga negosyante na tinanong ng WEF.

Ang Switzerland ang nanguna sa mga bansang pinaka­­magandang pagtayunan ng negosyo, habang ang Pili­ pinas ay nangulelat sa rank 87 na malayung-malayo kum­para sa mga kalapit na bansa sa Asya, tulad ng Hong Kong, 11th; Taiwan, 12th; South Korea, 19th; Malaysia, 24th; China, 29th; Brunei, 32nd; Thailand, 36th; at Vietnam, 75th.

Sa 12 pillars of competitiveness ng WEF, ang Pilipinas ay nakakuha ng napakababang score, tulad ng: institutions (113th ang ating bansa); infrastructures, 98th; macro­economic stability, 76th; health and primary education, 73rd; higher education and training, 68th; goods market efficiency, 95th; labor market efficiency, 113th; financial market sophistication, 93rd; technological readiness, 84th; market size, 35th; business sophistication, 65th; at innovation, 99th.

Ayon sa WEF, pangu­na­hing hadlang sa pagne­ne­gosyo sa Pilipinas ang ko­rap­syon. Prob­lema rin umano ang inepis­yenteng burukras­ya, mahinang imprastraktura, mabuway na mga polisiya, nakawan at iba pang krimen, mataas na buwis, banta ng ku­deta, mahigpit na labor regulations, mahinang public health system, maba­bang kalidad ng edukasyon at “poor work ethics” sa labor force.

Binigyang-diin ni Jinggoy ang pangangailangang ang taumbayan na ang gumawa ng paraan upang masolus­yu­nan na talaga ang korap­syon sa ating bansa, laluna’t mis­mong ang top leadership ng pama­halaan ang sangkot sa mala­laking anomalya at ka­tiwalian.

Sa mga gustong lumiham kay Senate President Pro Tempore Jinggoy Ejercito Es­trada, ipadala ito sa Room 602, Senate of the Philippines, GSIS Bldg., CCP Complex, Pasay City.