Mikey sa Sugbo

Salamat sa pagtandi ni Cebu City Mayor Tomas Osmeña sa ilang building ngadto sa kontrobersiyal nga Cebu International Convention Center (CICC), nagkapuliki na karon ang mga tagduma sa JSU-PSU Mariner’s Court-Cebu Building sa pagpanagang sa nagbaha nga reservations sa nagkalainlaing mga pundok, kasagaran mga buhatan sa kagamhanan. Bisan gigilokan nga naduhig sa away nilang Osmeña ug Gobernador Gwen Garcia, gihangop nila nga mas daghan nang nahibawo karon sa labing bag-ong building sa Pier Uno.

Nahinangop sab pag-ayo ang mga nakagamit na sa building. Di lang tungod sa kabag-o, kalimpiyo ug kahamugaway kun dili tungod sab, ug labi na, sa mas baratong abangan. Nga wa ra katunga kun itandi sa singil sa Kapitolyo alang sa CICC.

* * *

Wa ko katambong sa paniudto nga gidalit ni Osmeña alang sa mga representante sa COA, Ombudsman ug media aron makatabang sila pagtandi sa duha ka buildings. Apan mas una kong nakaadto. Kay didto ipahigayon ang labing unang Broadcasters Congress nga maoy pormal nga nibukas sa Cebu Broadcasters Month. Among pasaligan si Gobernador Garcia nga di si Osmeña ang nakakumbinser sa liderato sa KBP Cebu Chapter pagpili sa bag-ong building. Kun dili si Jun Tagalog, station manager sa DYLA. Kinsa nipahimus sa iyang kasikit sa mga tagduma aron malaslasan pag-ayong among abangan. Nitanyag sab og discount ang CICC apan bug-at lang gihapon kaayo alang sa bolsa sa kabos nga kahugpongan sa mga magsisibya sa Sugbo.

* * *

Ang akong masulti? Nakabentaha lang ang CICC sa kanindot sa iyang parking lot. Mas maayo sang iyang sound system. Ug mas dali hinumdoman ang CICC kay sa JSU-PSU MC-CB. Mas pulido ang trabaho sa bag-ong building. Way kang-a tali sa bungbong ug sa sawog nga maoy mosugat ni bisan kinsang mosud sa CICC. Wa say liki. Bisan nag-uwan atol sa Broadcasters Congress, way magsisibya nga nakabantay og bisan gamay nga tulo ug talisik. Humot pa gyod ang mga pansayan. Ug akong nahibaw-an nga mopalit nang mga tagduma og P2 milyones nga balor sa sound system.

* * *

Sa gusto nila o sa dili, mapugos sa pagsud sa bag-ong building ang amahan ug manghod ni Gobernador Garcia. Kay adto ipahigayon karong semanaha ang public hearing sa House Committee on Energy.

Gawas nga mahinungdanon ang tigom tungod sa nagsugod na pagtumaw nga kakuwang sa suplay sa kuryente sa Sugbo, may laing hinungdan nganong di kabalibad silang Kongresista Pablo Garcia sa ikaduhang distrito ug Kongresista Pablo John Garcia sa ikatulong distrito pagkuyog sa ubang mga kongresista sa Sugbo nga magpanon pagtambong sa husay: Ang tsirman sa komitiba mao si Kongresista Mikey Arroyo, anak ni Presidente Arroyo. Ug nahibawo tang tanan nga di ang kontrobersiya sa SALN ni Mikey ang makadani nila.

* * *

Email: [email protected]