Ang pitak na ito ay may pakialam
Sa result ng ating pambansang halalan;
Sana ang maupong pangulo ng bayan
Iaangat tayo at ang kabuhayan!
Kahi’t malayo pa nasabing eleks’yon
Mga kandidato’y kandarapa ngayon;
Sa TV at radio – anuns’yo’y maugong
At pati sa dyaryo’y lantad ang ambisyon!
Mga kandidatong di sanay sa hirap
Ay nagkakarerang gumastos sa ads;
Di sana ganito ang tumpak at dapat
Upang makilala ng bayan ang hangad!
Dapat ay naglimi mga kandidato
Bago pumalaot sa pag-aanuns’yo;
Sayang ang salaping inuubos ninyo
Na dapat napunta sa mga proyekto!
Dito ay maraming samahang pambayan
Na ang nilalayon tao’y matulungan;
Milyun-milyong pera ay dapat nalaan
Sa naghihingalo nating Inangbayan!
Personal ang perang inyong inuubos
Pero hindi dapat na tumapong lubos;
Parang yagit itong sumama sa agos
Kung hindi naukol sa maraming kapos!
Sana ang ginugol ng mga candidates
Ay idinonasyon sa samahang civic:
Sa mga kilusang hahango sa hapis
Sa Gawad Kalinga at Proyektong Pasig!
Kayong kandidato’y kilalang-kilala
Nitong sambayanan na mayayaman na –
Ano’t inuubos ang sariling pera
Sa isang labanang ngayo’y malayo pa!
Tingnan ang sinapit ni Mr. Palengke –
Sa pag-aanuns’yo ay sige nang sige;
Nang biglang umentra anak ng bayani
Salamat na lamang kung magiging bise!