Wala kita’y mapaabot nga tarong resulta sa imbestigasyon sa Provincial Board kalabot nianang kontrobersiyal nga pagpalit sa Balili lot nga lapad nga luna niini naglubog sa tubig-dagat aron tambakan og coal ash gikan sa Kepco power plant.
Hangtod nga dili nila paatubangon si Gobernador Gwendolyn Garcia aron pangutan-on sa iyang papel sa nasakpan nga panguwarta sa Kapitolyo, dili makab-ot ang tarong ug tiunay nga resulta sa imbestigasyon aron matino kinsay angay silotan tungod sa maong transaksiyon.
Sukad nabusisi sa mga Sugboanon ang panguwarta pinaagi sa Balili lot, walay laing opisyal sa Kapitolyo nga giduot og taman gawas kang Bokal Juan Bolo tungod sa iyang pag-angkon sa iyang kalambigitan sa transaksiyon nga mao ang pagpreparar sa draft sa MOA ug pag-sponsor sa resolusyon aron paghatag og gahum ni Gwen pagpalit sa luna.
Apan maayong atong balikbalikon nga ang memorandum of agreement (MOA) gipirmahan sa representante sa pamilyang Balili ug ni Gwen; ang tseke nga nagbalor og P98 milyones gipirmahan ni Gwen.
Kamo kunoy timbang asa nilang duha ni Gwen ug ni Bolo ang adunay labing dako og tulobagon sa mga Sugboanon: Si Bolo nga igo ra nagpreparar sa draft sa MOA nga kun makitang nakapaalkanse sa Kapitolyo mahimong isalibay ni Gwen, o si Gwen mismo nga mipirma sa MOA nga maoy nagtakda sa transaksiyon tali sa Kapitolyo ug sa mga Balili.
Kinsa kanilang Gwen ug Bolo ang labing sad-an: Si Bolo nga walay pirma nga nakita sa tseke nga gibayad ngadto sa mga Balili ug (kun tinuod) igo lang naghatod sa tseke ngadto sa buhatan ni Gwen, o si Gwen nga maoy nagpirma sa tseke.
Dili kaha nagkunsabo si Gwen ug Bolo apan sa dihang nasakpan ang tikas sa pagpalit sa luna diha sa Tinaan, Naga si Bolo nga huyang og impluwensiya maoy giduot?
Tan-awa ninyo si Gwen unsa ka walay batasan, wala pa gani mahuman ang pakisusi mi-preempt na sa “public opinion” pinaagi sa pagpakigkita sa mga editor, brodkaster ug kolumnista didto sa Kapitolyo aron kunohay ipresentar ang “trail” sa pagpalit sa Balili lot unya misibat ug nagsuroy-suroy sa Israel ug ugma sa Korea uban ang piniling mga sakop sa media.
Tingale, tuyo ni Gwen sa Korea mao ang pagpanguyab sa mga tagdumala sa Korean Electric Power Corporation (Kepco) sa dili pag-atras sa ilang pagbubo og puhonan sa Naga tungod sa nabaniog nga Balili lot nga gipalit sa Kapitolyo aron katambakan og coal ash gikan sa ilang planta sa kuryente.
Tiaw mo na, ang Kapitolyo maoy mipalit sa luna sa mga Balili aron lang patambakan og mga coal ash gikan sa planta sa Kepco. Tan-awa ninyo unsa ka-alkanse ang mga Sugboanon, kuwarta sa publiko ang gigamit paghatag og pabor sa pribadong kompaniya.
Ang nakapait pa gyud, ang coal ash gireklamo sa mga environmentalista nga makadaot sa kalikupan ug sa panglawas sa mga tawo.
Unya, aprobado na ba sa Asian Development Bank ang loan sa Kepco? Sa atong nasayran, ang ADB dili magpahulam og kuwarta sa mga pribadong kompaniya kun gamiton kini sa mga proyektong makadaot sa kalikupan.
Nganong wala may lokal nga kagamhanan o pribadong organisasyon nga nagkuwestiyon niini sa ADB?
* * *
Gipanghambog ni Mayor Tomas Osmeña ang pagtipon ni Kapitan Jojo Quijano sa barangay Calamba ngadto sa Bando Osmeña Pundok Kauswagan (BOPK).
Apan ang wala niya masayri nga ang ingon niini nga “set-up” sa BOPK maoy hinungdan nga nagka-leche-leche ang mga kandidato sa barangay elections nga alyado sa BOPK.
Si Quijano midaog batok ni kanhi Kapitan Esther Concha. Si Quijano alyado sa oposisyon, samtang si Concha sa BOPK.
Napilde si Concha, apan ang iyang gibasol si Kongresista Antonio Cuenco kay wala lagi kuno siya suportahi pinansiyal. Ang pagka-tinuod sa one-on-one fight, si Quijano ang gipaboran sa mga tawo tungod sa batasan ni Concha.
Apan ang maayong mahibaw-an ni Tomas nga adunay mga opisyal sa BOPK sa south district nga wala mosuporta kang Concha. Ang nakapit, si Cuenco ang nabuthan tungod sa mga intriga.
Ang intriga naggikan lamang usab sa mga taga BOPK nga wala mosuporta kang Concha.
Nayabag na ning kalibutana!
Apan ayaw ko’g ingnang nausab na si Tomas karon nga aduna siya’y ikaparang nga kusog-kusog diha sa south district? Timan-i ninyo nga naila si Tomas sa iyang pagkamadinumtanon. Daghang mga kapitan nga iyang gidumtan hangtod karon.
Apan unsa may iyang nakaon nganong nabali man ang hangin karon? Si Quijano nga alyado sa oposisyon dali man niyang gidawat sa BOPK.
Apan tan-awa ra gud, si Quijano gipanghambog ni Tomas, apan wala siya batia og ka-usik sa panagbulag sa maayo nilang kabubut-on ni Cuenco.
Hangtod karon, wala pay hukom nga nadunggan gikan ni Cuenco.
Si Jonathan Guardo nagpanikad na nga makig-alyado ni Cuenco. Gani, kini ang mipahibalo niadtong miaging adlaw nga si Cuenco mibali na sa Kugi Uswag Sugbo (Kusog).
Apan angay natong paabuton ang konpirmasyon gikan mismo ni Cuenco.