Pagpanglimpiyo lang gikinahanglan pa gyud ang Supreme Court ruling?

“GMA: Clean up bay now:” banner headline. Naunsa na god ning atong nasud, hasta ang pagpanglimpiyo, nagkinahanglan og mando sa Presidente? Ang maong presidential order gipasikad usab sa ruling sa Korte Suprema.

Ang maong kamanduan may kalabutan sa pagpalimpiyo sa Manila Bay, nga sulod sa dugay-dugay nang panahon, gipasagdan lang, kaylagi, busy kaayo ang atong gobiyerno sa ubang mga butang, sama sa pagsuroysuroy sa nagkalainlaing dapit sa kalibutan.

Atong masabut dinhi nga kun wala pay kamanduan sa Korte Suprema, ug kun walay presidential order, dili nato kamlipiyohan ang Manila Bay?

Pareha ra man ni sa giingong observation sa usa ka foreign journalist nga kono ang “Philippine laws are mere suggestions.” Sa ato, ang ato kunong mga balaud dinhi, mora la’g mga suggestions, mga sugyot lang ... mahimong tumanon mahimong dili.

Kun maglisud kita’g patuman sa atong mga balaud, unsa na kaha ang mga memorandum circular o mga resolusyon lang? Ug kun wala pa si environmentalist Tony Oposa midangop sa Korte Suprema bahin ning maong problemaha, di sad diay molihok ang atong gobyerno? Ug nganong nagkinahanglan pa man og presidential order aron molihok ang gobyerno? Di pa ba diay igo ang ruling sa Supreme Court?

Libug atong kutaw ini, Dro, da!

Nangayo lang si Oposa sa monthly report gikan sa hingtungdang mga cabinet secretary, suma sa gi-require sa Korte Suprema. Dihay mitubag, nga kuno mi-isyo na sila’g mga memorandum circular ug mga action plan apan kutob ra sila dinhi. Walay followup kun gituman ba ang mga memorandum ug gi-aksyonan ba ang mga action plan.

Makauuwaw ang banner headline. Kaylagi, atong usbon, nga lakip ang pagpanglimpiyo nagkinahanglan og presidential. Di ka mauwaw ana, Dro? Unsa may rason, way kwarta igasto paglimpyo sa Manila Bay? Giingon nga napulo ka opisyal sa gobyerno, migasto og 218 milyones ka pesos alang sa pangampanya nga ilang ginganlan og “info ads.” Kadaghan ining kwartaha, nganong wa man ni gamita paglimpyo sa Manila Bay?

Ug kadtong migasto sa pangaon didto sa New York, di ba nato mahangyo nga mo-donate silag tipik sa daghan nilang bahandi alang sa paglimpyo sa Manila Bay?