Mga buwang may 'ber'

Kay bilis ng araw September na naman

Narito nang muli ang mga “ber” months;

Mga buwan itong English kung pakinggan

At holiday seasons na inaabangan!

Hinihintay ito ng bata’t matanda –

Mga estudyante’t mga manggagawa;

Mahabang bakasyong pinakananasa

At ngayon ngang “ber” na darating na kusa!

Sinasabi nating ang X-mas holidays

Mahabang panahong sa bansa ay rest day;

Ito ay bakasyong kusang dumarating

Mga empleyado’y nauwi sa province!

Mga mag-aaral ay pawang masaya

Malayo’t malapit nagkikita-kita;

Ang mga teenagers ay magkakasama

Sa mga pasyalan ay barka-barkada!

Mga kabataang lalaki’t babae

Nagkakatuwaan sa araw at gabi;

Ang nagliligawang prinsesa’t prinsipe

Mapagsisino mo kung sinong magkasi!

At sa bawa’t taon mga buwang may “ber”

Magkakapit-bahay samaha’y matamis;

Dating magkaaway sila’y naglalapit

Lahat ay masaya’t ang Pasko’y sasapit!

Mga empleyado sa mga tanggapan

Palaging masaya ang puso’t isipan;

Lahat umaasa na sa huling buwan

Tatanggap ng “bonus” sa pinaghirapan!

Subali’t ang “ber” ay di laging saya

Ang idinudulot sa tuwi-tuwina;

Mga nasunugang tanggapa’t pabrika –

Walang ibibigay na mga biyaya!

May mga office ring nagsara ng pinto

Dahil ang capital at ang savings nito –

Ninakaw ng mga tauhang demonyo

Kaya may pamilyang malungkot ang Pasko.