Dear Dr. Elicaño, isa akong OFW dito sa Riyadh, Saudi Arabia. Madalas akong uminom ng kape hanggang sa maramdaman ko na kumakabog ang aking dibdib. Ito ba yung palpitations at dahil ba ito sa madalas kong pag-inom ng kape? Maraming salamat po. —DANTE S. GUTIERREZ
Ang kape ay may caffeine. Maaaring ang naramdaman mong kabog sa dibdib ay dahil sa madalas na pag-inom ng kape. Pero mas maganda kung ikaw ay magpapatingin sa isang doctor para malaman ang kondisyon.
Ang pagkabog o palpitations ay ang mabilis at iregular na pintig ng puso. Nararanasan ito kapag may ginagawang pinagbubuhusan ng lakas. Nagkakaroon din ng palpitations kapag ang tao ay nagagalit, nagugulumiha-nan at natatakot. Ganunman ang mga nakararanas nito ay hindi naman dapat agad mabahala sapagkat hindi ito delikado. Gayunman, kung ang palpitations ay masyado nang madalas na nangyayari, kailangan nang magpakunsulta sa doktor. Kailangang sumailalim sa diagnostic examinations.
Nagkakaroon ng palpitations dahil sa mga sumusu-nod: Pagkapagod, overactive thyroid gland, sobrang pag-take ng caffeine at alcohol at pagka-alergic sa pagkain. Ipinapayo naman ang pagkain ng mga madadahon at berdeng gulay at mga pagkaing butil na mayaman sa magnesium para maiwasan ang palpitations. Bawasan ang pag-inom ng mga inuming may caffeine. Ang paninigarilyo ay isa ring dahilan dahil sa taglay na nicotine.
Para malaman kung ang palpitations ay abnormal, tatanungin ng doktor ang pasyente kung ano ang dahilan nang pagkakaroon nito, ito ba ay dahan-dahan o biglaang nararanasan; ang tibok ba ng puso ay mabilis at iregular. Kung ang palpitations ay naranasan kasabay ng ibang sintomas tulad ng pananakit ng dibdib, pangangapos ng paghinga, panghihina, pagkapagod at panlalambot, maaaring may serious condition na kailangang malaman. Kailangang isailalim sa physical examination o diagnostic tests tulad ng electrocardiography, exercise tolerance test, X-ray tests, Echocardiography, Magnetic Resonance Imaging, Coronary Angiography at Cardiac Catheterization.