Extortion para eleksyon

Kaniadtong Martes sa hapon nadawat nako ang text message gikan sa usa ka lehitimong sakop sa Chinese Chamber of Commerce in Cebu nga nagpailang akong higala ug gireklamo ang gihimong illegal nga pagdakop sa dose ka mga Chinese nationals sa may Colon.

 Sigon sa reklamo ang maong mga Chinese nationals illegal nga gidakop, gidala ug gitanggong sa opisina sa Bureau of Immigration and Deportation sa mga confidential agents niini pinangulohan sa retiradong police nga ginganlan og Federico Camacho bisan kini walay mission order gikan kang Commissioner Libanan ug walay gahom sa pagdakop.

Matud pa sa reklamo nga 1.2 milyones ka pesos ang gibayad sa milyonaryong intsik aron lang makagawas ang doce ka mga dinakpan. Padayon pa sa reklamo, ang gihimong illegal nga pagdakop sa mga Chinese nationals paagi lang sa pagpangwarta aron mapundohan ang umaabot nga pagpapili ni Commissioner Libanan sa pagka kongresista.

Aron dili ta maigo sa ilang gitawag nga "misquoted" nia ang kinatibuk-ang mensahe nga akong nadawat. Di lang nako ipublikar ang iyang numero ug pangalan aron mapanalipdan ang iyang seguridad.

GUD pm GERI am ur chinese FREN ho s a bonafide member of Chinese Chamber of Commerece n Cebu cty.WE MET during d inauguration of PGMA n cbu wid Presidential Adviser for Visayas Felix Guanzon.I txt u to ask u an assistance to air and comment n ur program regarding d illegal arrest of 12 chinese nationals n colon cebu city ho were illegally brought and detain at BI detention without a mission order issued by Com.LIBANAN.CHINESE COMMunity n cebu city identifiedd BI arresting team Lead by CEFERINO Camacho etAl ALL CONFIDENTIAL Agents ho have no authority to make arrest. 1.2million was paid by a chinese millionaire for d release of 12 chinese nationals. THIS s an extortion activities to finance d candidacy of libanan for congressman.

Kay naka leave ko karon ug duha ka buwan sa akong programa sa DySS Super Radyo Cebu, dinhi ko na lang gipabuhagay kining maong reklamo. 

Aron di mapasanginlan sa kampo ni Camacho ug Libanan nga bias akong gipaningkamotan nga makuha ang ilang habig apan wa gyod nato sila masakpi.

Ang pasangil nga inyong nasayran karon batok sa mga confidential agents sa Bureau of Immigration and Deportation ug sa ila mismong labaw nga si Libanan seryoso kun ugaling tinood man kini busa angayan lamang silang bitayon sa punoan sa doldol. Apan kining maong pasangil mapamatud-an lamang kun ugaling mobarog, magpaila sa iyang kaugalingon ug motug-an sa hiwing binuhatan sa taga Bureau of Immigration ang giingong milyonaryong intsik nga mibayad og 1.2 milyones ka pesos aron makalingkawas sa illegal nga pagkabilanggo ang doce ka mga Chinese nationals.

Hinuon di upod ni nato sila mabasol kun ilang pili-on ang pagtago ug ang pagpakahilom tungod kay dinhi ugod sa Pilipinas ang magtug-an man sa tinood ang taralon ug gukoron samtang ang mga bakakon maoy duphan ug panalipdan sa mga gamhanan.

* * *

Ako diay nga pahalipayan ang BANAT NEWS nga nagsaulog sa iyang ika 15 ka tuig na human siya mahimugso kaniadtong Lunes. Ako usab nga pahalipayan sila si Edwin, Elly ug Super Bobby nga mga CAMMA awardees.