Tanga ba ang Kapitolyo?

Kagahapong adlawa gisugdan ang imbestigasyon sa anomalosong pagpalit sa Kapitolyo sa yuta sa lungsod sa Naga nga gipanag-iya sa mga Balili nga giingong ang sobra sa katunga niini dagat sa kantidad hapit moabot og usa ka gatos ka milyon ka pesos.

Pero klaro kaha ang padulngan sa maong imbestigasyon? Tumong kaha sa imbestigasyon ang pag-ila sa sad-an ug ang pagsilot niini o ang pagtabon sa sad-an tungod sa kasal-anang nahimo? Pero kadiyot sa, angayan pa ba silang mag-imbestiga?

Wa pa diay sila masayod kinsay sad-an? Di ba nag I am sorry naman to siya? Hay naku! Ambot lang!

Ang Kapitolyo mi-awhag usab sa National Bureau of Investigation sa paghimo og imbestigasyon sa pag-ila sa sad-an sa anomalosong transaksiyon. Pagkatoytoy! Naunsa na hinoon ni? Hastang sad-an nagpagoryo-goryo. Nagpakaaron-ingnon nga way kasal-anan.

Ang mga imbestigasyon gipasiugdahan tungod kay ang nagtungkawo sa Kapitolyo dili moangkon sa iyang nahimong kasal-anan. Nag I am sorry tood ang gobernadora pero nag Ponso Pilato man upod. Dili moangkon sa hingpit nga tanga! Tanga tungod kay mipalit og yuta sa kantidad hapit moabot usa ka gatos ka milyon ka pesos nga ang giingong sobra sa katunga diay niini dagat. Wa tan-awa tinood bang yuta ang iyang gipalit. Sa kagamhanan sa Kapitolyo ug sa kadaghang tawo niini wa gyod ni makasugo maski usa sa iyang mga janitor pag-adto sa Naga aron lili-on didto kun tibuok yuta ba ang gibaligya ni Balili? Tanga gyod!

Ang Kapitolyo buyer in good faith ba o buyer in bad faith? Sa mga balita nga atong nabasa, nakita ug nadungog sa radyo ug telebisyon makaingon ba ta nga ang Kapitolyo buyer in good faith o buyer in bad faith?

Ang mga abogado sa Kapitolyo nasayod nang daan sa saktong tubag ning maong pangutana gawas lang kun limbongan nila ang ilang kaugalingon aron kapanalipdan ang ilang rayna.