Mga kaliwat sa tamse

Sa dihang niadto ako sa Yati aron pagduaw sa mga utang nga wala pa kabayri, usa sa akong mga higala ang nagkanayon: “Padre, mura naman ka lagi og kaliwat sa usa ka TAMSE (Tambok nga Seksi) ako igo lang mibahakhak dungan ang pag-ingon: “Lagi pero tan-awa ang tiyan ko murag bola sa basket!” Sa pangedaron nga triyenta ako nakaamgo nga magmatngon gayud intawon aron sakit dili magping-it mao nga magbantay gyud sa kaonon labina sa mga pagkaon nga mantikaon. Tingali kitang tanan mga health conscious.

Kun ingon ini kita ka metikoloso sa atong pagkaon sa mga kalan-ong yutan-on, kumusta na kaha ang kahimtang sa atong kalag? Daghan nato ang nahimong mga tawong himsog sa lawas apan niwang man pud ang atong kalag. Ang Sagrada Eyukaristiya diin atong gikalawat ang atong Ginoo maoy naghatag kanato’g kalig-on. Dili kay kalig-on lang, siya pud ang misulod ug nahimong kabahin nato maingon nga kita nakighiusa ug nahimong kabahin niya. Hinaut unta nga sa atong pagkalawat kanunay sa lawas ug dugo ni Cristo, nahimo kitang mahisama kaniya... Mentras tanto akong itunol ang akong pahalipay sa bag-ong pari nga si Padre Ruel Desamparado RCJ nga giordenahang pari dili pa lang dugay sa Isla sa Bantayan Sugbo. Sakop siya sa Rogationist Fathers ug kami classmate kaniadto samtang Rogationist pa ako. Kanimo Padre Ruel Congratulations!