"I thought Cory was already irrelevant"

Mao kini ang pamahayag sa usa ko ka higala nga wala mobilib ni Cory, kinsa matud niya, usa lang ka mere housewife. Matud niya pagsugod sa Edsa revolution, gisugdan nila ni Enrile ug Honasan (wala pay apil si Ramos), si Cory dinhi sa Sugbo. Sa ato pa, walay labut si Cory pagsugod sa EDSA.

Buot niyang ipasabot nga dili kono angayan nga i-credit ngadto kang Cory ang nahitabo sa EDSA. Tuod man, sa among pagtimbangtimbang sa role ni Cory sa Edsa, nakapangutana ming duha nga kun wala pa si Ninoy, kun wala pa si Cory tapus patya si Ninoy, duna ba kahay EDSA ?

Kun duna may EDSA, apan wala si Cory, wala si Cardinal Sin, wala sila si Butch Aquino, wala ang pipila ka maisugong taga-media ug Radio Veritas, ug kun wala pa ang katawhan nga giaghat ni Cardinal Sin pagpaluyo ni Cory, unsa man kaha ang matang sa EDSA ang atong nahiaguman ?

Sa maong mga pangutana, nahiuknol ming duha. Mi-conclude siya nga kun wala pa si Cory, mahitabo ba kaha ang EDSA ? Ug kun wala may labut si Cory sa EDSA, nganong diha man itunol ni Enrile ug sa katawhan ang gahom ngadto kang Cory ?

Nganong wa man mo-insiser si Enrile ug ang katawhan nga maoy ipapanumpa isip presidente si Ernile mismo o si Ramos, kun wala pay labut si Cory ? Sa laktud, nahitabo ang EDSA, mihugop ang katawhan, katawhan from all walks of life, gumikan ni Cory, kinsa maisugon ug mapangahasong nakig-atbang sa gamhanang Marcos, diin kitang tanan mitalaw ug mikakak.

Imagine, mere housewife lang, nakigsangka ni Marcos. Ikaw, Dro, diin ka man niadtong panahona? 

Pagkanaug ni Cory sa gahom, paglabay sa daghang katuigan, maoy pagtuo sa uban nga irrelevant na siya. Wa na siya’y kapuslanan, ug di angayan tuhoan. Gani, ang iyang mga kaatbang medyo nagbugalbugal na man kaniya ug sa iyang banay.

Ang outpouring ug spontaneous nga reaction sa katawhan sa iyang pagkamatay ug paglubong, taliwa sa pagbunok sa ulan, naghulagway sa iya pang pagka-relevant. Alang sa katawhan, maunsa man ang pagtoo sa uban, nahitabo ang EDSA gumikan ni Cory, kay alang nila, kun wala pa si Cory, ambut duna bay EDSA. Gisugdan nila ni Enrile ug Honasan ang EDSA gumikan sa ilang nakita nga support sa katawhan ni Cory.

Otherwise, kun gipaka-bali-wala lang si Cory sa katawhan, kaylagi usa lang ka housewife, ug kun pananglitan si Doy Laurel o si Enrile ang mikandidato batok ni Marcos, mahitabo kaha ang EDSA?