May bag-ong anggulo sa kontrobersiyal nga pagpalit sa Kapitolyo sa 25 ka ektaryang luna sa mga Balili sa Naga, habagatang Sugbo nga gibutyag si Provincial Treasurer Roy Salubre: Naimpasan na nilang mga Balili niadtong Oktubre sa niaging tuig ug gipakatapan dayon sa Kapitolyo og blue guards aron hingpit nang makontrolar ang kabtangan; apan wa gyod sila magtagad pag-survey sa kinatibuk-ang gidak-on ug mga utlanan sa luna.
Hangtod karong semanaha. Human hingpit nang niulbo ang kontrobersiya sa mga pasangil nga kabahin sa luna naa pa sa ilawom sa dagat, ug busa di mahimong ibaligya. Matud ni Salubre mahibaw-an na sud ning semanaha ang sangpotanan sa survey nga gihimo sa geodetic engineers sa Kapitolyo.
* * *
Kuwestiyonable nang daan ang wa pag-survey sa Kapitolyo sa luna sa wa pa nila palita. Mas kuwestiyonable, ug kapasanginlan na gyod gani sila nga iresponsable, nga wa sila magtagad asa nagsugod ug asa kutob ang kabtangan nga ilang napalit, siyam ka buwan human sila way pupanagana nga nigasto sa P98 milyones sa buhis nga hinagoan sa mga Sugbuanon.
Hinaot nga pasudlan sa Kapitolyo sa mga sakop sa media ang gikagubtan nga luna. Hinaot nga bakwion ang paghikaw sa mga dokumento gikan sa mga abogado ug ubang nagpakabanang mga Sugbuanon. Aron di mosamot ang pagduda nga duna silay gitagoan.
* * *
Una, bakak ang taho ug kabahin lang sa propaganda sa oposisyon ug mga komunista; ikaduha, yano ug di tinuod nga luho ang panihapon; ikatulo, bisa’g P1 milyon pay gasto laing tawo di si Pres. Arroyo ang nagbayad; ug ikaupat, mas makauuwaw kun gipakaon si Arroyo sa hotdog stand.
Ang nag-usab-usab nga panagang sa Malakanyang sa pagkabisto sa dul-an sa P1 milyon nga panihapon nilang Pres. Arroyo ug kaubanan sa Le Cirque sa New York mao ra say ilang gihimo sa nangaging mga eskandalo: Bahala na kun mamakak, bahala na kun masakpang namakak ug bahala na kun mag-usab-usab ang bakak; ang mahinungdanon mao nga malipat ug malibog ang katawhan hangtod nga mabugnaw nang kontrobersiya, o maapsan sa sunod nilang pakauwaw.
* * *
Mahimong sama sa naandan makalusot na sab si Arroyo sa labing bag-ong bulilyaso. Ang politikanhong oposisyon wa nang kakita og kapuslanan sa pagpasaka og laing impeachment complaint batok niya. Huwaton na lang nila nga mapupos ang termino ni Arroyo. Ug way makabasol nila. Ang paggawong ni Arroyo sa mayoriya sa mga kongresista maoy motino nga basurahan ang padulngan sa bisan unsang kaso nga ilang ipasaka.
Maong mahimong makalingkawas gihapon si Arroyo sa nabistong pagpamakak sa iyang statement of assets, liabilities and net worth (SALN). Kay ang Ombudsman ug ubang mga buhatan nga gitahasan pagsusi sa katinuod sa iyang mga pangangkon, nga nakatag-an mo iya sang ginawongan, utro sang wa mokihol.
* * *
Email:leo_lastimosa@abs-cbn.com