Daghan nag naani nga kadungganan ang Sugbu sa natad sa sayaw. Ang Dakbayan bag-o pa lang miani sa garbo og world record isip kinadaghanang nanayaw sa Dance Class sa tibuok kalibutan, sa sobra 7,000 ka entrante. Ang atong mga piniriso sa CPDRC kon Cebu Provincial Detention and Rehabilitation Center ilado na kaayo sa tibuok kalibutan sa ilang mga sayaw sa youtube, nga miani nag 30 ka milyon ka tumatan-aw, ug sa binulan nilang pasundayag.
Kaniadtong Miyerkules sa gabii, midalikyat ko sa Cebu International Convention Center kon CICC aron motan-aw sa mga display sa atong mga negosyante ug exporters. Tuod man, mipasundayag na sad sa abilidad ang atong mga kaigsoonan sa ilang mga hinimo nga produkto, kasagaran sa maong mga produkto gipangbaligya sa ubang nasud og mahal, apan didto sa CICC mas barato kaayo ang mga presyo. Adunay mga burloloy nga tag P25 lang, apan nindot nga pagkabuhat ug makita gyud nato ang pagka-fashionista sa mga Sugbuanon. Ang uban niini akong nakita sa nasud sa Pransya nga gipangbaligya sa mga tindahan sa kapulo tingali kapil-a nga presyo. Duna say mga lingkoranan, lamesa ug uban pang kabtangan nga hinimo sa mga inilang Sugbuanon. Gani, giingong ang uban sa mga Sugbuanong mi-desinyo sa maong mga produkto mao man sab ang mi-desinyo sa mga kabtangan sa pipila ka artista didto sa Hollywood.
Gipahigayon sab sa maong gabii ang pagpili sa Festival Queen sa Probinsya sa Sugbo. Nagsul-ob ang mga kandidata og mga bongga gyud kaayong mga gown nga nahihaum sa ilang mga festival. Pananglitan, ang gown sa kandidata sa Badian, hinimo sa banig, kay ang ilang festival mao man ang Banig Festival. Sa Alegria, adunay desinyo sa kawayan kay Kawayan Festival man sab ang ila. Sa Bantayan, ang desinyo mao ang mga isda ug koral sa dagat, nga haum sa Palawod Festival.
Ang maong piniliay wala lamang masentro sa kandidata mismo. Kay ang usa ka makapadani sa mga tumatan-aw mao man sab ang mga gown nga gipangsul-ob nga mga maanindot kaayo nga design ug maka-ingon kita nga kini mao tingali ang primerong pasundayag diin ang mga gown sa matag festival pwerte gyung nindota ug orihinal pa gyud. Ang tanang nagtan-aw bibo ug nalingaw kaayo sa mga kandidata ug sa ilang mga gown.
Gawas sa Festival Queen, mismo ang festival sa matag lungsod gipasundayag usab. Kadtong wala makaadto sa matag lungsod, nakahigayon gyud pagtan-aw unsa ang nagklase-klaseng sayaw sa festival sa kalungsoran.
Siguradong sa sunod tuig ug sa mga tuig umaabot, magka-bongga kining maong pasundayag. Giingong ang tawong adunay abilidad sa arte ug sayaw mas adunay kamaya. Niining kalibutan karon nga daghang pagsulay, ang arte ug sayaw usa sa tambal aron magpabiling himsog ang atong emosyon ug panghunahuna.
* * *
Alang sa inyong mga panahom, palihug email sa hinuktoki@gmail.com. Daghang salamat.