Usa ka sakop sa City Traffic Operations Management kon CITOM ang nadakpan sa National Bureau of Investigation atol sa entrapment operation kagahapon tungod sa pagpangilkil niini og kwarta gikan sa usa ka taxi driver.
Ang gidakop sa mga ahente sa NBI nga gipangulohan ni Special Investigator Florante Gaoiran mao si Christian Catoto nga nadistino sa Road Warrior Towing Services, usa sa mga towing contractors sa dakbayan.
Si Catoto nangangkon nga kanhi close-in bodyguard ni unang ginang Margot Osmeña ug bayaw sa kanhi executive officer sa CITOM nga si Dennis Jabonero gidakop tungod sa pagpangayo niini og P3 mil gikan sa taxi driver nga si Jessie Rica.
Si Rica, driver sa Richelda Taxi, gidakop ni Catoto niadtong Biyernes sa gabii diha sa Magallanes St. tungod sa giingong upat ka mga kalapasan niini sa lagda sa trapiko. Giingon nga mihunong si Rica sa no stopping sign, ni parking sa junction box, obstruction of traffic ug laing violation nga di na niya mahinumduman.
Si Catoto giingon nga mikuha sa lisensiya ni Rica ug wa mo isyu og citation ticket o ba kaha temporary operator’s permit. Sumala pa nga dunay laing kawani sa towing company ang miduol kaniya ug miingon nga bayran nalang si Catoto aron makuha ang iyang lisensiya.
Sa dihang gihatagan ni Rica og P50 si Catoto gikatahong mibalibad ni tungod kay gigamyan sa maong kantidad. Matud ni Rica nga giingnan siya nga adto nalang sila magkita sa opisina sa CITOM.
Apan dihang gisusi sa driver didto sa buhatan sa CITOM iyang nasuta nga wa diay i-report ni Catoto ang iyang lisensiya. Niadtong Lunes gimanduan siya nga mobayad og P3 mil bugti sa pag-uli sa iyang lisensiya.
Matud ni Rica nga wa siya makahatag dayon sa maong kantidad sanglit wa siya’y kwarta hinungdan nga gihatagan siya og kutob kagahapon sa udto aron pagkuha niini. Nagsabot ang duha nga magkita didto sa atubangan sa BPI sa N. Bacalso Avenue gahapon sa udto apan mat-an pa’s pinya si Catoto.
Igo lang niini nga gihapit ang driver nga si Rica ug gimanduan nga moangkas sa iyang motorsiklo tungod kay nagduda siya nga dunay entrapment operation. Midemanda dayon si Catoto sa P3 mil samtang luwan sila sa motorsiklo apan dihang wa ihatag ni Rica ang marked-money gibawi sab niini ang iyang lisensiya.
Tungod niini napugos ang mga ahente sa NBI paggukod niya hangtud sa iyang pinuy-anan didto sa Bliss, Labangon diin didto na siya masikop. Nabawi gikan niya ang lisensiya ni Rica.
Si Catoto mihimakak nga nangayo siya og kwarta gikan ni Rica apan di niya maisplikar nganong wa niya itugyan sa ilang opisina ang lisensiya nga dul-an naman sa usa ka semana sukad sa iyang pagdakop kang Rica.
Supak sab sa lagda ang iyang gihimo nga pagkuha sa lisensiya nga wa siya’y gi-isyu nga TOP. Maayo tingali nga ipaubos sa seminar ang mga sakop sa CITOM aron sila matudloan sa hustong paagi pagpanakop.
* * *