Si Mayor Tomas Osmeña mipahibawo nga iya nang did-an ang mga estudyante nga wala magpuyo sa siyudad sa pag-eskuyla’g nursing sa CCMC College of Nursing.
Wala kaayo’y oposisyon kun pagsupak nga nadungog. Kini tungod kay ang maong prohibisyon lahi kay sa pag-ban sa mayor ngadto sa mga dili siyudadnon sa pagpatambal sa Cebu City Medical Center.
Ang bag-ong prohibisyon wala man molambigit og kinabuhi sa mga masakiton. Paghatag man kini og dakong kahigayonan sa taga-siyudad sa pagtungha sa CCMC College of Nursing diin ang kagastohanan dili ingon ka taas sa mga pribadong nursing schools.
Gani daghang miuyon sa desisyon sa Mayor ug nasabtan usab kini sa mga ginikanan sa mga estudyante nga atua nanimuyo sa kalungsoran.