Mirisi

Nakapisos ang medical director sa Cebu City Medical Center nga si Myrna Go gikan sa mga miyembro sa konseho sa dakbayan atol sa session sa konseho niadtong Miyerkules.

Kini tungod sa kapakyas ni Go pagtuman sa mando ni Mayor Tomas Osmeña kun unsaon pag-atiman ang mga pasyente nga natakbuyan sa kagaw sa dengue.

Nahibaw-an man gud sa mga sakop sa konseho nga ang usa sa 11 ka mga namatay sa dengue niadtong buwan sa Abril wa maayo og atiman diha sa CCMC. Si Bise Mayor Michael Rama miingon nga ilang nasayran nga ang pasyente unang gidala sa maong tambalanan apan igo lang gitan-aw sa mga doctor.

Matud pa nga wa ni ipaubos sa proseso sa pag-atiman sa mga pasyente nga gidudahang dunay sakit nga dengue sama sa pagkuha og dugo alang sa laboratory examination. Dihang gidala pagbalik ang pasyente labihan na ka grabe ang sakit hinungdan nga bisan og gibalhin ni didto sa pribadong tambalanan ug giabunohan og dugo wala na gyud matabang.

Laing bulilyaso ni Go mao ang wa pagbutang sa gimando sa mayor nga “fastlane” aron maoy motagad dayon sa mga pasyente nga gidudahang dunay dengue.

Gawas niini nasuta sab nga bisan kun libre ang mga pasyente nga dunay dengue sa mga laboratory examinations diha sa CCMC ila ni nga i-refer ngadto sa usa ka pribado nga laboratory gawas sa tambalanan.

Basi sa mga report ang maong laboratoryo gipanag-iya pud sa usa ka doctor nga nagsilbi nga consultant sa CCMC. Ang pagduda mao nga dunay komisyon ang mga doctor nga maka-refer ug pasyente. Usa ra gyud ka pulong ang haum ihulagway sa kasaba nga nahiaguman ni Go atubangan sa mga sakop sa konseho ug kini mao ang “MIRISI.”

Alang nako dili igo ang kasaba nga iyang nadawat kun dili angayan gyud siyang paphaon sa katungdanan. Kaniadto pa nga akong gisugyot ang paghulip ni Go tungod kay wa gyu'y hibangkaagan ang maong doctor sa pagdumala sa tambalanan.

Naglibog ko nganong nahimo siyang hepe sa CCMC nga bangkaruti man gyud siya sa abilidad sa usa ka maayo nga lider.

* * *

Sa akong interview ni Go sa dyLA kagahapon matud niya nga angayang hatagan siya sa mga konsehal sa kompleto nga detalye sa mga reklamo aron siya makahimo og aksiyon.

Matud niya nga di makiangayon nga diritso siyang kasab-an atubangan sa konseho nga wa gani siya mahibawo sa detalye sa reklamo. Mipasumbingay si Go nga pamolitika ang gihimo sa mga sakop sa konseho tungod kay hapit na ang eleksiyon.

Posibli nga dunay kamatuoran ang iyang pagtahap nga namolitika ang mga konsehal apan angayan sab niyang hinumduman nga bisan sa wala pa magsing-abot ang eleksiyon diha na daan ang daghang reklamo.

Mismo ang mayor wa mahimuot sa iyang pagdumala gani dihay mga higayon nga gihulga nga sirad-an ang maong tambalanan. Ang maayong buhaton ni Go mao ang pagpamutos aron pagsalbar sa bisan dyutay nga nahibilin sa iyang pagkatawo.

Mas maayo nga mo-resign siya kay sa paabuton nga palagputon siya sa hingpit sa pwesto.

* * *

[email protected]