Dili lalim sa usa ka pamilya kun hasion og mga pagpanghulga sa kinabuhi ang mga sakop niini. Mao kini ang sitwasyon karon sa pamilyang Pagobo sa Lapulapu nga gikatahong gihasi og armadong tawo.
Nagsugod kini sa dihang usa sa mga sakop niini nga si Jerry Pagobo napatay, samtang ang suspetsado nailhan sa kapolisan ug napasakaan og kaso.
Ang nakapait lang, ang suspetsado hangtod karon nagpabiling gawasnon bisan sa kasong gipasaka.
Sa atong pagsukitsukit sa maong kaso, nasayran nga si Piskal Exequiel Rubi mirekomendar nga kasong homicide ang ipasaka ug dili murder batok sa suspetsado sa pagpatay ni Jerry.
Dili nato makuwestiyon ang “findings” sa piskaliya.
Apan kun ang huwes nga nagkupot sa kaso dili mo-isyu og warrant of arrest batok sa suspetsado sa pagpatay, lahi na kana nga estorya.
Dili na lang nato hisgutan ang merito ug demerito sa kaso, apan ang pagkuwestiyon nganong wala mo-isyu si Judge Victor Teves Jr. og warrant of arrest batok sa suspetsado dili mahulog og subjudice.
Dili man merito sa kaso ang warrant of arrest tungod kay butang kini nga sibo lamang nga buhaton sa usa ka huwes subay sa Revised Rules of Criminal Procedure sa higayon nga gipasaka na sa piskaliya ang Information ngadto sa iyang sala.
Nasayod si Judge Teves nga ang atong Rules wala maghatag og discretionary power sa huwes pagpang-isyu og warrant of arrest.
Kay kun discretionary pa unta kini, ang huwes mo-isyu og warrant of arrest sa gusto lamang niini.
Ang mga biktima sa krimen ang sumbalikan ug mangahurot ang mga biktima kun ingon pa niini ang Rules, dili ba Judge Teves?
Dili lalim sa pamilyang Pagobo kun ang nahitabo nilang Wilfredo Tongco Jr. ug Jerman Pagobo nga gipangharas ug gipanghulga tungod kay ang suspetsadong si Jaime Ponce Daño pabiling gawasnon tungod kay wala lutsi og warrant of arrest ni Judge Teves.
Si Tongco ug Pagobo nagpa-blotter sa barangay Punta Engaño human siya giingong gihulga sa suspetsado sa pagpatay ni Jerry Pagobo nga si Jaime Ponce Daño pinaagi sa pag-ingon nga dili pabuhion og mga pulong nga makalagot niya aron dili niya hutdon ang pamilyang Pagobo sama sa iyang gibuhat kang Jerry.
Pastilan, kakuyaw ba diay nga lugar ang Lapulapu kun ang huwes diha dili mo-isyu og warrant of arrest sa tawong gikiha og kasong pagpatay.
Pagsugod pa lang sa kaso, wala nay hustisya nga mapaabot ang pamilyang Pagobo. Mao nay labing pait!
* * *
Angayan lapdosan ni Cebu Police Provincial Office director Jesus Gaquing Jr. ang iyang mga sakop nga mga polis sa Compostela sa kapakyas pagpahunong sa ilegal nga sugal sa maong lungsod.
Ang nakaparat lang, gilikoliko ni Gaquing ang isyu aron matabonan ang kapolpol ug kabanga sa iyang mga sakop diha sa Compostela pagpuhag sa ilegal nga mga kalihukan sa lungsod pinaagi sa pagpasangil sa magsuong Mayor Ritchie ug Gilbert Wagas nga mi-interbener sa ronda nga gipahigayon sa Provincial Intelligence Branch (PIB) nga gipanguluhan ni Supt. Rodolfo Albutra.Dili katuohan ang pasangil sa PIB nga si Gilbert mipatunga atol sa ronda sa usa ka hantakan sa luyo nga bahin sa merkado.Angay i-probar sa kapolisan ang pasangil batok ni Gilbert aron maklaro kinsa kanila sa kapolisan ug sa mga Wagas ang nagpaluyo sa ilegal nga kalihukan diha sa maong lungsod.
Una nakong pangutana, unsa ka dako ang hantakan sa Compostela nga padad-an gyud ni Gaquing og mga elemento sa PIB aron rondahon?
Nasayod kita nga ang hantakan estambayan lamang og mga de sensiyo nga sugarol nga kun hup-an sa kapolisan mag-alibwag sa pagpanagan.
Ikaduha nakong pangutana, kana lang ba diay’ng hantakan luyo sa merkado sa Compostela ang ilegal nga kalihukan nga sukad kaniadto sa panahon ni Supt. Carmelo Valmoria hangtod mihulip si Gaquing mao pay gipanghambog nga dakong operasyon batok sa mga ilegal sa maong lungsod?
Binuang kaayo!
Ang mga Wagas bag-o lang gipahibalo ni kanhi Pres. Joseph Estrada nga maoy giilang lider sa United Opposition (UNO) dinhi sa lalawigan. Si kanhi Senador Ernesto Maceda miila sa kaisog sa mga Wagas pagpakigsakbang sa mga kandidatong gipaluyohan sa mga Durano.
Wala kaha sugoa sa mga Durano si Gaquing nga rondahon ang gamay’ng hantakan aron kapangitaan og paagi nga daoton ang mga Wagas pinaagi sa pagpasangil nga miinterbener kini sa ronda?
Ang mga Wagas nahimo karong puling sa mga mata sa mga Durano sa kinto distrito nga mga loyal ngadtong Pres. Gloria Macapagal-Arroyo.
* * *
Niadtong Sabado sa gabii, napugos ko og maneho sa akong sakyanan paingon sa Poblacion, Talisay aron pagtambong sa birthday party ni kanhi Customs District Collector David “Kuya Boy” Odilao Jr.
Wala pay alas 8 sa gabii mibiya ko sa among pinuy-anan sa Meadowland Subdivision sa barangay Pakigne, apan sa pag-demano na nako gikan sa highway paingon sa dalan paingon sa Mohon, gikuyawan ko kay gawas nga hilabihang kangitngit sa lugar nga ang mga tawo nga manglabang lisud hikit-an kun hinay ang headlight, pagkadaghan pa gyud nga libaong sa karsada.
Nakahisgot ko niini tungod sa nahitabo sa higala nakong pari nga si Fr. Botoy Rabusa kinsa napatay sa mga karahong tulisan sa barangay Cansojong, nga tungod niini, ang pagsaway sa publiko nasentro sa kangitngit sa maong lugar.
Si Kongresista Eduardo Gullas misaad nga mohimo og pamaagi aron masug-an ang pipila ka lugar sa Talisay.
Apan kinahanglan ba gyud diay’ng buhisan og dugo sa usa ka pari una kita maka-amgo sa atong kapakyasan pagpasuga sa lugar?
* * *
Happy birthday diay ni Kuya Boy Odilao. Mga panghinaot nga hatagan ka ni Lord og dugang pa’ng katuigan. Unya mo-congratulate usab diay ko ni Kuya Boy ug Ate Babie nga iyang kapikas sa bag-o lang nilang pagsaulog sa ika-50 nga anibersaryo sa ilang kaminyoon.
Happy birthday kuya!