EDITORYAL - Task Force motorcycle

Ang dakbayan sa Sugbu mimugna og Task Force Motorcycle kang kansang katuyoan mao ang pagpalig-on sa puwersa sa kapolisan batok kriminalidad.

Daghang lungsoranon ang mihangop niining maong lakang sa kagamhanan sa siyudad.

Ang ka epektibo sa maong task force gipanglantawan nga makab-ot kun tumanon ang mga lagda nga gipasunod sa mga sakop niini.

Adunay sugyot gikan sa pipila ka mga tigpaniid nga ang matag motorsiklo luwanan og duha ka polis o ba kaha usa ka regular nga polis inubanan og usa ka deputy.

“Dili mapatunhay ang kaepektibo sa task force kun usa ra ka polis ang mosakay kay unsaon man niya pagpakigpinusilay sa kriminal kun ga-drive siya sa motorsiklo?” panahom sa usa ka retiradong opisyal sa army.

Daghan ang nagtuo nga molampos kining Task Force Motorcycle basta sundon ang gilatid nga mga lagda labot niini.