Utang ni Kiko

Saludo ko sa kapolisan sa Talisay tungod sa dinalian nga kasulbaran sa pagtulis ug pagpatay ni Fr. Jovencio Rabusa niadtong Lunes sa gabii samtang naglakaw diha sa South Reclamation Project.

Human sa kapin sa 24-oras nadakpan dayon sa kapolisan sa dakbayan sa Talisay ang mga suspetsado nga sila si Ronald Tradio, Russel Rabanes ug ang 15 anyos nila nga kauban pagtulis ni Rabusa.

Ang tulo una nga nadakpan sa kapolisan diha sa Talisay samtang ang ika-upat nga suspetsado nga si Jonas Andrade Turawan nasikop sab kagahapon sa buntag didto sa Barangay Tiguis, Poro, Camotes.

Si Turawan didto mosibat sa Camotes human sa ilang pagpanulis sa pari. Siya maoy giingon nga mikuha sa belt bag ug cellphone sa pari human ni pusila ni Rabanes dihang misuway pagsukol atol sa ilang pagtulis.

Ang kapolisan gipaabot nga mopasaka og kasong robbery with homicide batok sa mga suspetsado apan sigurado nga di malakip ang minor de edad tungod sa gimbut-an sa Juvenile Justice Act.

Ang maong balaud nga gipangamahanan ni Senador Francis “Kiko” Pangilinan nag-exempt sa nagpangidaron og 15 anyos paubos gikan sa bisan unsa nga criminal liability kun sila makahimo og krimin.

Mao nga bisan nasulbad sa kapolisan ang pagpatay sa pari apan alang sa iyang mga membro sa pamilya mahulagway siguro nga haw-ang ang maong kalampusan. Kini tungod kay duna may suspetsado nga di mamahimong mapasakaan og kaso aron patubagon sa iyang nahimong krimin.

Ang Juvenile Justice Act nagmando lang nga siya itugyan ngadto sa Department of Social Welfare and Development o ba kaha sa Local Government Unit aron ipaubos sa diversion program.

Kun unsa nga klase sa diversion program ambot, siguro mismo si Pangilinan wa masayod niini. Ang tinuod di gyud andam ang atong gobyerno pagpatuman sa maong balaud.

Una way andam nga diversion program ang mga local nga kagamhanan nga maoy gitahasan sa balaud pagpatuman niini. Ikaduha wa say sentro nga kabutangan nila ang tanang mga local government units.

Ang Talisay City pananglitan diin didto mahitabo ang krimin, duna ba silay sentro nga kabutangan sa mga minor de edad sama sa 15 anyos nga kauban sa mga suspetsado pagtulis ni Rabusa?

Nabalaka ko nga ang mahitabo niini, buhian ra pod ang maong suspetsado unya mobalik lang pod ni sa iyang naandan nga pagpanulis. Ang balaud ni Pangilinan nag-aghat hinuon sa mga minor de edad nga mahigam paghimo og krimin tungod kay nasayod man sila nga di sila mamahimong gukdon.

Mao nga alang nako ang matag tulo sa dugo sa mga inosente nga biktima sa linuog nga krimin nga binuhatan sa mga minor de edad nga giprotehian sa balaud ni Pangilinan, iyang utang sa matag pamilya sa mga biktima.

* * *

Email: [email protected]