CEBU, Philippines – Sama sa uban usa usab ako ka makasasala. Usa ako ka repentant sinner. Apan, samtang gilingi ko ang akong kagahapon sa tumang pagbasol gumikan sa mga kasal-anan nga akong nahimo.
Nagpasalamat usab ako sa akong mga kahuyangan kay gumikan niini ako nalig-on. Gumikan sa akong sayop ako nga nakit-an ang husto. Gumikan sa kangitngit akong nailhan ang kahayag. Ug gumikan sa bakak ako nga napalgan ang kamatuoran.
Pananglit kaniadto nagtuo ako nga dili makadaot ang sobra nga kaon ug kahago. Apan, ako nga napalgan ang ako nga dako nga sayop sa diha nga giatake na ako. Gumikan sa akong masakit nga kasinatian nagbantay na ako sa akong pagkaon. Wala ko na ibutang ang akong kaugalingon diha sa pamahala. Kun dili gibutang ko na gayod og seguro nga ang tanan pagkaon nga mosulod sa akong lawas dili makadaot kanako. Nagbantay na usab ako nga dili mahago pag-ayo.
Ang akong sayop kagahapon maoy naghatag kanako og kaalam aron dili na masayop ugma. Ang akong kagahapon maoy nagtug-an kanako nga kun unsa gani ang imong itanom mao usab ang imong anihon. Nga ang kalipay imo lamang makab-ot kun andam ka nga mopas-an o mosagubang sa mga kasakit.
Matud pa ni Josh Billings:" Experience is a school where a man learns what a big fool he has been."