Hinumdom mo nilang Talyux Bacalso, Billy Legaspi, Emon Fernandez, Jun Davide, Pernes (nakalimot na kos uban), nangahas pagtukod sa Pusyon Bisaya, nagtuga-toga’g sukol sa kang Marcos nga KBL?
Ang tanang political leader sa tibuok nasud, silang tanan, KBL. Kadtong wa mahinumdom ug kadtong wa pa matawo niadtong tuiga, atong pahinumdoman, ug atong pahibaw-on nga dinhi sa Sugbo, ang tanan natong mga local officials (di lang nato sila nganlan, tingalig masuko), didtong Marcos.
Sa ato pa, sila si Talyux napugos ug nangahas pagpakig-atbang sa atong mga lider dinhi sa Sugbo, nga sa pagkatukod gyud sa Puyson Bisaya, nahimo silang kataw-anan.
Nagsalig si Marcos tungod kay iya ang gobernador, ang mga city ug municipal mayor, lakip mga barangay captain. Sa ato pa, iya ang tanan. Ang na-overlook ni Marcos, mao nga samtang iya ang mga local officials, dili iya ang mga tawo.
Ang nahitabo, at least dinhi sa ato, napukan ang gamhanan kaayo nga KBL sa walay hinungdan nga Pusyon Bisaya. Kahinumdom ka ini, Dro?
Karon, ilang gipasibantog ang merger sa Lakas, Kampi ug CMD, nga kono labing gamhanan nga partido sa nasud karon. Tinuod, gamhanan kaayo. Mas gamhanan pa tingali kay sa kang Marcos nga KBL. Gamhanan tungod kay anaa kanila ang daghang kwarta ug ang gahom. Ug sama sa KBL, ila ang tanang local officials.
Pangutana: Makaseguro sila nga ila usab ang mga tawo? Ang labing uwahi nga public acceptance survey sa atong mga national leaders, si Gloria ang labing ubos nga rating. Apan, sama sa panahon ni Marcos, gi-ignore usab kini sa mga tawo ni Gloria, kay kono, wa sila malisang niining mga survey-survey ug popularity rating kay igo lang silang nagtrabaho.Very good, kun mao.
Kun tinuod nga history repeats itself, ang nahitabo sa hilabihan ka gamhanan nga KBL, mahitabo ba kaha usab sa mas gamhanang LAKAS-KAMPI-CMD? Ambut mo-epekto pa ba kaha kun asa dapig si Ramos, nga sama sa EDSA 1, maghuwat man lang ni siya kun hain pabor ang hangin.
Ang paningkamotan karon sa administrasyon, mao nga magpabilin ang pagkasiak sa oposisyon. Unya, pahimuslan ang ilang mga ambisyon, daghan ang managan pagka-presidente, ug kun maka-field sila si Gloria og tarong nga kandidato, dili recycled, dili maisip nga traditional corrupt politician, dunay dakung kahigayonan nga magmadaugon ang LAKAS-KAMPI-CMD.
Kini ang ipa-homework sa mga sinaligan ni Gloria: Pagpili kinsa ang mahimong standard bearer sa gamhanan nilang partido. Ayaw na lang nang CHA-CHA/CON-ASS.