EDITORYAL - Moro-moro sa politika

Nagsugod na ang moro-moro sa natad sa politika sa nasud. Dihang mikuyanap ang balita nga si Presidente Gloria Macapagal-Arroyo nakahunahuna nga modagan para sa Kongreso unya sa 2010, gibalita usab nga si kanhi Presidente Erap Estrada modagan usab para sa Kongreso diha sa iyang distrito sa San Juan.

Ang tuyo ni Erap dili tungod sa iyang tinguha nga makasilbe sa iyang konstituwente kun dili, sumala niya, ang pagbabag sa tinguha ni Mrs. Arroyo nga mamahimong Prime Minister.

Suma pa sa mga tigpaniid, kining gihugon-hugon nga modagan si GMA pagka-Kongresista usa kini ka tilimad-on nga mahinayon gayud ang Charter Change (Cha-Cha) ug mabali ngadto sa pagka-Parliamentary ang porma sa atong gobiyerno.

Ginganlan nga moro-moro kining gibalitang plano ni Erap sa pagdagan sa Kongreso tungod lang sa pagpakgang sa gibalitang intensiyon ni Mrs. Arroyo nga mamahimong Primero Ministro.