Isip organiko o naggikan sa mga hayop ug mga tanom, ang bitamina adunay duha ka matang o klasipikasyon. Kini mao ang mga bitaminang matunaw sa tambok ug ang mga bitaming matunaw sa tubig.
Ang mga bitaminang matunaw sa tubig mao ang Vitamin B1 (thiamine), Vitamin B2 (riboflavin), Vitamin B3 (niacin o nicotinic acid), Vitamin B5 (pantothenic acid), Vitamin B6 (pyridoxine), Vitamin B12 (cobalamin), Biotin, Folic Acid (folate o folacin) ug Vitamin C (ascorbic acid).
Ang Vitamin B1 makuha gikan sa baboy, seafoods, cereals, brewer's yeast, nuts, legumbre, mga prutas ug mga utanon. Makatabang kini aron ang lawas makagamit sa carbohydrates sa hustong paagi, sa paghilis sa kinaon ug pagpalagsik sa lainlaing parte sa lawas, labina gyod ang utok.
Ang Vitamin B2 makuha gikan sa baka, manok, pabo, itom nga karne, isda, cereal, mga liso, green leafy vegetables ug mga prutas. Makatabang kini sa pagpabaskog sa mga selula ug aron ang lawas makabenepisyo’g maayo sa mga pagkaon.
Ang Vitamin B3 makuha gikan sa manok, isda, baka, atay sa baka, mga bukog, nuts, pan, cereal, prutas ug utanon. Makatabang kini pagsulbad sa suliran sa dyspepsia, pagpataas sa HDL cholesterol ug pagpaus-os sa LDL cholesterol.
Ang Vitamin B5 makuha sa cereals, legumbre, dahonan nga mga utanon, itlog, gatas ug prutas. Gikinahanglan kini aron makabenepisyo ang lawas sa mga pagkaon ug sa regulasyon sa function sa kaugatan. (Sunod: Vitamin B6 ug uban pa)