Kagahapong adlawa gilusad sa nagkadaiyang kahugpongan nga misupak sa nauyonang resolution 1109 sa Ubos Bay balauranan nga nagtawag sa usa ka constituent assembly alang sa pag usab sa 1987 nga batakang balaud ang usa ka halapad nga protesta lukop nasud.
Sentro sa maong protesta ang mga kabalaka nga ang Con-As maoy magbukas sa dalan alang sa pagpabilin ni pangulong Arroyo sa Malakanyang.
Ang kabalaka sa kahugpongan nga nagprotesta angayan lamang una kini nga ipadaplin tungod kay layo ra kini sa kamatuoran. Hinoon, samtang di ta mabalaka di upod ta magkompiyansa sa mga lihok nga pagahimoon sa mga alipores ni Pangulong Arroyo.
Ang house resolution 1109 aprobado lamang kini sa ubos balay balauranan ug gipikatan lamang kini sa senado. Ang senado way plano nga makigsayaw og cha-cha sa mga kongresista.
Ang atong kongreso naglangkob og duha ka balay: ang ubos balay balauranan ug ang senado. Kay duha man kini sila, ang unsa man nga resolution o balaudnon nga maaprobahan sa ubos balay balauranan kinahanglan usab nga aprobahan sa senado o ang unsa man nga resolution o balaudnon nga maaprobahan sa senado kinahanglan usab nga maaprobahan sa ubos balay balauranan. Ang mga naglusad og protesta nasayod niini. Kay wa may plano ang senado nga mokuyog sa pagsayaw og cha-cha sa mga kongresista busa di ta angayan nga mabalaka niini.
Ang isyu sa Con-As gipadako lamang sa mga politiko aron duna silay kasakyan sa ilang pagpamolitika ug pagpasikat aron dali nga mahinumduman ang ilang mga pangalan inig abot sa piniliay. Gipadako usab sa mga politiko ug mga kahugpongan ang isyu sa Con-As aron maprinta sa huna-huna sa katawhan nga adunay dautan nga plano ang kagamhanang Arroyo.