Si Erap ug ang iyang ka sikat

Sa bag-o lang nga gipagawas nga resulta sa gipahigayong survey sa Pulse Asia sa mga presidentiables nag-una si Bise Presidente Noli de Castro nga adunay 18 porsiyento. Nagsunod kaniya si Chiz Escudero nga adunay 17 porsiyento, Erap Estrada nga adunay 15 porsiyento, Manny Villar nga adunay 14 porsiyento ug Mar Roxas nga adunay 13 porsiyento. Samtang sa survey nga gihimo sa Social Weather Stations kaniadtong Abril 16 hangtod sa Mayo 6 ning tuiga migawas nga nag-una sa mga presidentiables si Manny Villar nga nakakuha og 22 porsiyento sa mga respondents ug nagsunod kaniya si Noli De Castro nga adunay 18 porsiyento. Nahimutang sa ikatulong dapit sila si Chiz Escudero ug Erap Estrada nga pulos nakakuha og 14 porsiyento. Gisundan usab sila nila ni Loren Legarda nga adunay 10 porsiyento, Mar Roxas nga adunay 9 porsiyento ug Ping Lacson nga nakakuha og 6 porsiyento.

Sa daghang presidentiables kining maong mga pangalan ang kanunay nga mogawas nga posibleng mamahimong presidente sa nasud. Apan atong itutok ang resulta sa survey ngadto ni kanhi Presidente Erap Estrada nga gipalagpot sa katungdanan, gipriso ug gikonbikto sa kasong pagkawkaw sa bahandi sa nasud apan gihatagan og absolute pardon ni Presidente Gloria Macapagal-Arroyo.

Nganong bisan og gipalagpot na sa katungdanan, gipapriso ug gikonbikto na sa kasong pagpangawkaw sa bahandi sa nasud daghan man gihapon ang gustong mapresidente pagbalik si Erap Estrada? Buot bang ipasabot niini nga kitang mga Pinoy dali ra gayod nga makalimot o wa lang gyud ta motuo sa mga pasangil ngadto ni Erap o ba kaha sikat lang gyod si Erap?

Unsa man ang anaa sa huna-huna sa katawhang Pilipinhon ngadto kang Erap sukad pa kaniadto ug hangtod karon. Biktima lang ba si Erap sa barot nga politika dinhi sa nasud hinungdan nga sa dihang gipalagpot siya sa katungdanan agi og consuelo giilisan nato siya nila ni Loi ug Jinggoy Estrada unya karon gusto napod nato siyang ibalik sa pagka presidente sa nasud?