Base sa gihimong pagtuon sa mga eksperto, ang tubig maoy labing epektibong pa-slim ug pangpaniwang. Namatud-an usab sa maong pagtuon nga epektibong pagpaniwang sunod sa tubig ang dili sinagolan og asukar nga juices.
Sumala sa Consumer Rights Protection Centre sa Rhineland-Palatinate didto sa Germany, ang tawo nga gustong moniwang o mo-slim kinahanglan moinom og usa ngadto sa duha ka litrong tubig sulod sa usa ka adlaw.
Dugang niini, gibutyag sa Gewicht in Griff (Weight Under Control Center) nga mas daghan ang mga tawo nga nakasabot sa sintomas sa kagutom kay sa ka uhaw mao nga imbes moinom, mokaon nalang hinuon, Usahay gani masaypan pa ang kauhaw ingon nga kagutom.
Mipasabot ang Gewicht in Griff nga pakusgan sa fluid (tubig) ang metabolismo sa tawo mao nga mas dali nga mahilis ang tambok. Ang tubig maayo usab sa skin tone ug sa kahimsog sa panit.
Gikinahanglan ang pag-inom sa hustong gidaghanon sa tubig aron mas daling mahilis ang kinaon, labina na gyod ang tambok, aron magpabilin nga slim. Gisugyot sa Gewicht in Griff ang paghimo og drinking schedule aron pagsegurong mahimong tulumanon ang pag-inom og tubig ingon nga kabahin sa pagbaton og himsog nga panglawas. (Sunod : Ang Utok)