Ang tawo, by nature, lisud usahon. Gikan pa sa panahon nila ni Adan ug Eva, tapus sila mosukwahi sa kabubut-on sa nag-umol kanila, ang kalibutan nagkaguliyang, ang katawhan nagkatibulaag, conflict dinhi, conflict didto, investigation dinhi, investigation didto … hangtud nga ang tawo nga buot untang mohimo’g kausaban, mo-uli sa kaligdong ug katarong sa katilingban, gi-isyohan na hinoog warrant of arrest, gitaral sa hukmanan ni Pontius Pilate, gipakauwawan, gisakit ug gilansang sa cross.
Mao kini ang nasinati sa kalibutan. Linugdangan sa pagpabadlong nila ni Adan ug Eva. Nag-unay, nagkabingkil, ug wala ug di gyud magkasabot. Mao kini ang nahitabo karon sa oposisyon. Hilabihang bungkaga. Silang tanan pulos bright, silang tanan gustong mag-lider – walay gustong mag-follower, silang tanan gustong mag-presidente.
Ang resulta, walay maka-lead kanila. Walay makahiusa kanila. Unsaon man tuod nimo pag-lead sa usa ka pundok nga ang tanang sakop sa pundok gustong mag-lead? Kinsa may atong maisip nga lider sa oposisyon? Si Erap? Si Binay? Si Jun Lozada? Si Mar-Korina Roxas? Si Villar nga gisigihag pakauwaw ni Lacson ug Madrigal? Kinsa man?
Mao nga kun magpadayon man kining maong talan-awon, mora ra mag magdayon gyud, hilabihang hayahaya ni Gloria, nga kun makapili lang siyag husto ug ligdong nga mga kandidato, ug dili i-recycle kadtong giluwa na sa lungsod, sama kanila ni Pichay, Defensor ug Singson, maglawig ang mga administration candidates.
Kay ato ra bang makita nga samtang unpopular na kaayo si Gloria, apan ang oposisyon walay ikatanyag nga alternative. Unsa may ilang mahimo? Unsa may ilang ika-offer nga reform ug mga kausaban? Unsaon man nila pag-unite ang country nga di man gani sila maka-unite sa ilang kaugalingon nga pila lang na sila ka buok?
Lagmit, pinaagi ni Danding Cojuangco, ang administrasyon mokuhag taga-oposisyon nga maoy padaganon pagka-presidente. Mahimo nga wa nay klarong official administration candidates. Sa ato pa, kun makuha sila si Loren ug Escudero ni Danding, ang mahitabo, oposisyon vs. oposisyon. Ug mao gyuy mudaog ang oposisyon nga dapigan ni Danding ug ni Gloria.
Si Lacson? Mora mag ang role ni Lacson, mao ang pagbuak sa oposisyon. Nag-anam ka kusog si Villar, maoy hinungdan nga gisigihan na siya karog kuhit ni Lacson. Hinumdom mo nga bisan og nahibawo siya nga di gyud siya kadaug, milansar gyud sa miaging presidential election, aron pagbuak sa oposisyon, ug aron pagseguro nga di kadaug si FPJ? Mao sad ni ang iyang gibuhat karon. Molansar gihapon ni siya, aron segurong mabuak ang oposisyon. Hayahayang Gloria no?