Maayong patilawon

Maayong patilawon og kiha kining mga artista nga mag-usab-usab sa tono sa Nasudnong Awit kun mo-awit niini sa mga boxing championship sa gawas sa nasud.

Nanganad na lang gyud kining mga artista nga mag-usab-usab sa Lupang Hinirang tungod kay sa matag higayon nga himuon nila kini, walay mga tinugyanan sa kagamhanan nga mobadlong ni mosilot kanila.

Katapusang nakadawat og pagsaway sa mga Pilipino ang akong idolo nga singer nga si Martin Nievera human niya giusab makaduha ang tono sa atong Nasudnong Awit atol sa junior welterweight world title fight sa MGM Grand Garden Arena sa Las Vegas tali nilang Manny Pacquiao ug sa Briton nga si Ricky Hatton niadtong Domingo.

Dili lang makausa kini nahitabo, apan nahibulong ko nga kutob lang sa yawyaw ang mga opisyal nganong usab-usabon ang tono nga aduna man unta kini opisyal nga tono nga gisagop sa atong Republika, ang tono nga gitagik ni Julian Felipe.

Dili ko motuo nga wala masayod ang mga artista niining patakaran nga dili mahimong usab-usabon ang tono sa atong Nasudnong Awit, apan ang pagkahaguka sa atong kagamhanan paggukod kanilang mga gahi og ulo maoy nakapagara kanila pagkanta sa lain-laing tono.

Adunay mikatap nga balita sa mga showbiz website nga adunay pagtugot sa National Historical Institute ang pag-usab sa tono sa Lupang Hinirang niadtong Domingo.

Nayabag na! Mahimo diay patyon ang orihinal ug naandan nga tono sa atong Nasudnong Awit pinaagi lang sa pagtugot sa usa ka ahensiya sa kagamhanan.

Hasta ang maong institute – kun tinuod nga mitugot sa pag-usab sa tono – maayong pamakngon ang ulo.

* * *

SWINE FLU. Na-ukay ang tibuok kalibutan niining gikahadlokan nga swine flu virus tungod sa liboan na ka mga tawo sa nagkalainlaing mga nasud nga nataptan niining maong sakit nga matud nila gikan sa baboy.

Adunay pipila giingong namatay tungod sa maong virus.

Apan dinhi sa atong nasud, mura og wala kaayo kita mabalaka niining maong sakit bisan sa kamatuoran nga ang Pilipinas abtanan sa nagkadaiyang mga nasyonalidad tungod sa maanindot ug daghan natong mga tourist destination nga gimasyar sa atong kagamhanang nasyonal.

Daghan gihapon kanato ang kusog kaayong mokaon og baboy, ilabi na kun humbaon o adobohon.

Apan mas maayo na lamang kini kay sa maparehas kita sa ubang nasud nga ang mga tawo natarantar na sa paghugpa niining maong sakit.

Sa mga commercial district sa Amerika ug Europa makita ang mga tawo nga naglakaw sa sidewalk ug nanglabang sa karsada nga nanagsul-ob og mga surgical mask.

Klaro na kaayo ang pandemic tungod sa maong sakit.

Ang nakanindot dinhi sa ato, alerto kaayo ang mga nahingtungdang mga ahensiya sama sa Bureau of Immigration ug Bureau of Customs.

Sa mga tugpahanan sa nasud, sama sa Mactan Cebu International Airport, adunay gipamutang nga mga kahimanan aron dali nga ma-detect ang tawo nga posibleng magdala niining swine flu virus.

Makadaghan na gipakita sa balita sa telebisyon ang kahimanan sa Bureau of Immigration nga gimontar sa MCIA aron makatabang pag-ila niadtong mga langyaw’ng pasahero gikan sa gawas sa nasud nga mopaingon dinhi ug kadtong mga Pilipino nga mobalik dinhi.

Ingon na niini kaabtik ang BID-7 ubos sa pagdumala nilang kanhi regional director Butch Juña ug sa regional director karon nga si Casimiro “Jun” Madarang III.

* * *

DE CASTRO. Klaro na kaayong wala na higustohi sa mga opisyal ug kawani sa BID-7 si Assistant City Prosecutor Mary Ann Castro. Hasta na ang iyang amo sa Department of Justice nasayod na   niini human gipursige ang pagka-suspenso niini.

Naglibog gyud ko nganong karon pa mo-aksiyon si Justice Sec. Raul Gonzales nga kaniadto pa man niya masayri ang problema ni Castro ug sa mga opisyal ug kawani sa BID-7.

Tingale, kun gi-aksiyonan pa ni Gonzales ang reklamo kaniadto sa mga personnel sa BID-7 batok kang Castro sa dihang si Geronimo Rosas pa ang regional director, dili unta ma-ingon niini kadako ang mahidangatan ni Castro ug sa mga personnel sa BID-7.

Kun wala pa mangisog si Press Secretary Cerge Remonde aron maputol ang detail order ni Castro sa BID-7, dili usab tingale mo-aksiyon si Gonzales ug mopursige sa mga kasal-anan niining nahimo.