Dawat og bahin?

Nagduda karon si Tinago barangay konsehal Joel Garganera nga si Mayor Tomas Osmeña nagdawatan kuno og “bahin” sa kita sa mga private towing companies nga gikuha sa CITOM nga motabang kanila batok sa mga sakyanan nga masakpang mag-illegal parking.

Gisuwayan nako pagkuha’g reaksyon si Tommy. Mao ni ang iyang tubag.

“I think that, it’s easier and even more lucrative to get a share from the Ciudad project, but I don’t think like Garganera and certainly don’t share his values.

“Anyway, let him explain to the judge that its OK to bash the head of towing personnel and steal from them because he believes I’m getting a share.”

Wala g’yod hinoo’y lig-ong basihanan si Joel sa iyang pag-ingon nga nagdawatan kuno’g “share” sa kita sa mga private towing companies.

Ang nahibudngan lang ni Joel kay ngano man kuno nga si Tommy nangunay man g’yod pag-ingon nga kinahanglan siya nga pasakaan og kaso tungod sa pagbadlong niya dihang ang mga sakop sa One-Stop Towing Services dunay sakyanan nga guroyon unta.

Dunay opisyal sa City Hall nga abtik kaayong mirason ug milaban sa mayor pinaagi sa pag-ingon nga natural nga masuko si Tommy kay siya man ang chairman sa CITOM.

Si Tommy maoy nagmando nga paspasan ang paghimo og kampanya sa mga sakyanan nga ipataka lang og parking daplin sa mga karsada.

Buyno, lisud g’yod pamatud-an ang maong pasangil, ilabi na kun walay motug-an.

* * *

Dili na karon sayon ang pag-apil sa subasta sa mga yuta ug building nga ibaligya sa dakbayan tungod kay wala na bayri og buhis sa mga tag-iya.

Kaniadto, ang kantidad nga mahimong bayran sa mga mosalmot sa subasta kon bidding mao ra ang kantidad sa buhis nga wala mabayri, apan karon ang tinuod na g’yod nga presyo sa yuta.

Hala, kadtong mga tag-iya og kayutaan ug mga building nga wala na buhisi, asikasoha ang inyong mga obligasyon sa City Hall mentras tanto nga wala pa masubasta ang inyong kabtangan.

* * *

Misakay ko’g PUJ niadtong Huwebes unya gitug-anan ko sa usa ka drayber kabahin sa usa ka traffic enforcer nga kurakut.

Kini maoy mga traffic enforcer nga makahatag lang og kauwawan sa ubang mga tigpatuman sa balaud diha sa kadalanan.

Sa laktud, mga walay uwaw kining maong mga traffic enforcers nga mangilkil sa ilang mga madakpan.

Kun ako’y makadakop og drayber nga makalapas sa balaud sa tukmang pagmaneho, pasabton pa nako kun unsay ilang mga sayop ug sa uban pang dili maayo nilang buhaton.

Daku kining hagit ni Arnel Tancinco ang pag-usab sa batasan niining mga traffic enforcer nga kurakut.

Apan unsaon, nga bisan si Arnel gidudahan man sa uban nga nagdawatan usab kay mamili man og asa niya ipatuman ang balaud.

Aw, ako hinoon dili pa dayon motoo sa mga report nga akong nadawat samtang dili pa ko makadawat og lig-ong basihanan.

Kini god si Arnel, kusog kaayong mibutang og puthaw nga railing sa parking area atubangan sa ubang balay-patigayon, apan gasiga lang ang mata diha sa uban nga unta bag-o man nga building nga maoy gilatid sa ordinansa.

Daghan kaayo ko og gitudlo ni Arnel, apan piyong-piyong lang tingali ang mata kun moagi.

May laing bag-o nga building diha sa Don Mariano Cui dapit na sa eskena Escario, ang parking area nasupak sa ordinansa. Nganong wala man dayon nimo kini aksyoni Arnel?

Pagkuyog mo si Engr. Josefa Ylanan, assistant chief sa Office of the Building Officials, aron matan-aw ninyo ang building ug ipatuman ang balaud kay daplin kaayo kini sa karsada ug makahasol sa pag-agi sa mga sakyanan ang “diagonal parking.”