Pekeng dolyar

Dili pa lang dugay, gibalita sa usa ka national daily tabloid nga gipatik didto sa kaulohan nga mikuyanap ang peke o mini nga dollar bills didto sa Metro Manila.

Ang Manila Police District (MPD) mipahibalo gani nga nakasikop na silag pekeng mga salapi nga mokabat sa P50,000 kon i-convert ngadto sa salaping Pilipinhon. Ang operasyon sa kapolisan gipahigayon didto sa Quiapo, Manila.

Sumala sa gipahibalo sa kapolisan, gawas sa nasakpan nga pekeng dolyares, aduna usay pekeng P100, P500 ug P1,000 bills.

Gihisgotan ko kini kay bisan tuod nga atua kini mahitabo sa Manila, dili imposible nga makaabot kini dinhi sa ato sa Sugbo ug sa ubang mga dapit sa Kabisay-an ug Mindanao.

* * *

Dili maglisod ang mga sakop sa sindikato nga responsable sa pagpakatap sa pekeng mga dolyares sa pag-abot sa Sugbo kun mao gyoy ilang tuyoon. Pero manghinaot ta nga sa pagtunob gayod sa ilang tiil sa yuta sa Sugbo -- kun moanhi gyod sila -- masikop dayon sila sa abtik natong mga tinugyanan sa balaod.

Angay gyod bantayan sa mga awtoridad ang modus operandi ning mga tawong responsable sa pagpakaylap sa mini nga mga salapi.

* * *

Daghan kog nadawat nga mga text reklamo nga angay gyod untang kapaambitan sa mga magbabasa. Ugaling lang kay kulang sa mga detalye ang sumbong sa mga texter maong dili nako ma-utilize.

Kasagaran sa mga texter nga mosumbong kay nabiktima sa mga badlongon sa katilingban maoy gilabi ang ilang kasuko. Dili na hinuon maklaro ang pagdetalye nila sa ilang sumbong.

Awhag nako sa tanan nga gustong mo-interact ning atong lindog nga klaroha gyod ang inyong detalye. Labing maayo nga dunay eksaktong lokasyon. Pananglit dunay moreklamo og anomaliya sa Basak. Asa man nga Basak? Daghan ra bag dapit nga "Basak" sa lalawigan sa Sugbo. Kinahanglang dunay specifics ang inyong sumbong.

Salamat!

* * *

 (Sumbong ug reklamo? Text sa 0910-8105522).