Trabaho: Batakang katungod sa tawo

Ugmang adlawa laing tuig na usab sa atong pagtimaan sa adlaw sa mga mamumuo. Tungod niini lain-laing mga kalihokan ang gipasiugdahan sa nagkadaiyang kahugpongan sa mga mamumuo dinhi sa Sugbo. Kaniadtong miaging adlaw gisugdan sa mga militanting grupo sa mga mamumuo ang ilang pagtimaan sa adlaw sa mamumuo pinaagi sa pagpahigayon og mga lihok protesta ug pagsunog sa Labor Code sa nasud tungod kay wa kini makapanalipod sa ilang mga katungod.

Tinuod! Ang atong Labor Code mas nanalipod pa sa mga kapitalista kay sa kanatong mga mamumuo kana tungod kay mipabor ngadto sa mga kapitalista ang nagpatuman sa maong balaod. Ina kay maoy manalipod natong mga mamumuo, nahimo na hinuon ang Labor Code nga taming sa mga kapitalista sa ilang pag-abuso sa nagkadusingot tang lawas.

Ang pagpanarbaho ning panahona wa nay kaseguroan tungod kay sayon ra kaayong matangtang sa iyang trabaho ang usa ka mamumuo.

Ang trabaho usa ka batakang katungod sa tawo nga dili unta sayon-sayonon lang sa pagkuha kay kun kuhaon kini gikan kaniya mahikawan siya sa kapanginabuhian nga moresulta unya sa paghikaw sa iyang katungod sa pagpakabuhi. 

* * *

Sa kada kinse segundos, usa ka mamumuo ang mamatay tungod sa mga work-related nga aksidente ug sakit. Sa kada kinse segundos, 160 usab ka mga mamumuo ang naaksidente tungod sa iyang trabaho. Mao ni ang numero nga gihatag sa International Labor Organization segun sa ilang pagbana-bana.

Dinhi sa Pilipinas, 58,000 ka mga kaso usab sa occupational injuries matag tuig ang natala sa 2003 BLES Integrated Survey-Occupational Injuries Survey nga gipahigayon. Ang pangutana, nagpakabana na ba niini ang atong gobiyerno aron luwas ang mga mamumuo sa ilang pagpanarbaho.