Gipanghambog sa SSS nga dako ang pundo niini ug gani molongtad pa kini hangtod sa tuig 2036. Salamat kun tinood man ugaling kining maong panghambog kay di na ta mabalaka nga maabtan sa pagkabangkarota panahon unya sa atong pagretiro sa pagpangempleyo.
Apan sa pagka lig-on sa pundo sa SSS, kumusta kaha ang mga miyembro niini. Gikumusta kaha niini ang iyang mga miyembro? Giatiman kaha sa SSS ang suliran sa mga miyembro niini?
Seguro dili lang ingon ini ka lig-on ang pundo sa SSS kun gigukod pa niini ang mga kompanyang tulisan nga mitulis sa atubangan sa iyang mga empleyado. Mga empleyado nga gikaltasan ang suhulan para sa SSS premium pero ang maong premium wala diay makaabot ngadto sa nahisgutang buhatan. Mga utang nga naboktot na sa pagbinayad ang mga utangan pinaagi sa salary deduction apan ang maong bayad wa diay makaabot ngadto sa SSS.
Ang kadaghan sa mga empleyado nga nangatang-tang sa ilang trabaho tungod sa kalibutanong krisis apan wa makapahimulos sa gipanghambog sa pangulo sa nasud nga benipisyo nga makuha alang niadtong apektado sa nahisgutang suliran tungod kay way remittances usa ka dakong basihanan nga nahinanok ang SSS sa ilang trabaho pagtan-aw sa mga kompanya nga way remittance sa SSS premium nga nakolekta gikan sa ilang mga empleyado.
* * *
Wa gihapon ipaila sa mga police ug mga prosecutors ang pangalan sa mga akusado nga ilang gipasakaan og kaso nonot sa pagbanhig-patay kang piskal Osorio. Kini tungod sa rason nga ila unang patubagon sa kasong giatubang ug aron dili kini makasibat. Unsa may nakalahi ning kaso ni piskal Osorio sa ubang kaso dinhi sa Sugbo? Nganong yano man lang sa mga police ang paghatag sa pangalan niadtong mga akusado sa ubang mga kaso ug dili ning kang piskal Osorio?