MAINIT na mainit ang balitang posibleng magsanib ng lakas ang dalawang religious group na El Shaddai at Jesus is Lord Church sa darating na 2010 sa layuning makapagluklok ng isang leader na maka-Diyos. Kung may tig-limang milyong miyembro ang bawat grupo, sampung milyong boto ang kahulugan nito kung maita-translate into votes. That’s unbeatable huwag lang madadagdag-bawas.
Ayon sa aking impormante, unang nag-usap sa telepono sina Eddie Villanueva at Mike Velarde na iisa ang adhikain: Ang pagkakaroon ng isang righteous government. Ang salitang binitiwan umano ni Velarde kay Villanueva ay: “Go for it Bro. Eddie if you feel in your heart God wants you to run.” Diyan daw nag-umpisa ang mas malalim na pag-uusap kasunod ng posibleng pagsasa-nib-lakas ng JIL at El Shaddai.
Kapwa Christian group na may magkaibang doktrina ang JIL at El Shaddai. Pero sa palagay ko, kung nagkakaisa ng layuning baguhin ang buktot na sistema ng pamamahala, dapat ituloy ang balak at kailangang suportahan ng taumbayan.
Hinog na ang panahon para sa isang matuwid na pamahalaan. Sa lumang Tipan ng Bibliya, mababasa ang siglo ng mga mabubuti at masasamang hari na umugit sa Israel at Judah. Kapag masama ang hari, mamamayan ang nagdurusa pero kapag naluklok ang maka-Diyos na hari, ang bansa ay pinagpapala.
Kung matutulad ang Pilipinas sa ganyang cycle, masyado na tayong nababad sa masamang pamamahala at hindi na ito pahihintulutan pa ng Diyos na magtagal. Panahon na para sa isang mabuting leader para sa Pilipinas na mag-aakay sa bansa sa landas ng kariwasaan at kapayapaan.