Daghan og pamaagi ang mga mangingilad aron sila makabiktima sa ilang isigkatawo. Usa sa ilang estilo sa modus operandi mao ang paggamit sa ngalan sa pari sa ilang pagpasalir sa ilang tinonto.
Ang estilo mao nga mangolekta kunohay sila’g donasyon. Unya, ilang patuohon ang ilang prospective victim nga (kuno) gisugo sila sa usa ka pari sa pagpangolekta’g donasyon alang sa usa ka proyekto sa simbahan.
Dili man daotan ang paghatag og donasyon, labina kun ang maong donasyon alang sa proyekto sa Simbahan. Pero mas maayong atong seguroon nga lehitimo ang pagpangolekta’g donasyon ug dili mahulog ngadto sa pribadong bulsa ang atong kuwarta.
Mas maayong atong tinuon kun tinuod ba nga ang usa ka parokya nagsugo ni Pulano ug ni Pulana sa pagpangolektag donasyon. Aduna man goy mga badlongon sa katilingban nga abtik kaayong mopahimulos sa higayon. Mangolekta kunohay og donasyon alang sa simbahan pero alang ra diay sa ilang kaugalingong bulsa. Gamiton pa ang ngalan sa usa ka pari.
Pagbantay kamo niining maong modus.
* * *
"Good AM, Sir. Kini bang giingon nga wagtangon ang drug test sa mokuha og lisensiya. Mosamot kadaghan ang mga driver nga adik. Maayo tingali nga kanang suspenso maoy ilang wagtangon ug dili ang drug test."
Daghan ang nag-ingon nga wala (kunoy) kapuslanan ang drug test alang sa mokuha og driver's license kay daghan man kunong makalusot nga mga adik nga driver.
Apan nabalaka ko nga ang pagwagtang sa drug test makapasamot sa pagdagsang sa mga adik nga driver. Kun dunay driver nga adik nga makalusot sa drug test--tungod sa hukos-pukos o dili -- unsa na kaha kun wala na gyo’y drug test nga makapugong nila? Mosamot gyod kadaghan ang mga adik nga driver kun wala nay makababag kanila.
Bentaha na lang kun naay drug test kay kun makatumong ang adik nga mga driver sa ligdong nga drug testing center, mamatud-an man gyod nga positibo sila sa ginadiling drugas.
Busa, uyon ko sa panahom sa atong texter nga dili lang wad-on ang drug test.
* * *
(Sumbong ug reklamo? Text sa 0910-8105522).