Pari gireklamo

Nakadawat ko’g taho o reklamo gikan sa usa ka sakop sa parokya sa usa ka lungsod sa North Cebu nga naggamit sa cell. no. 0910-5577200. Ang iyang reklamo nga gipaagi sa text mahitungod sa usa ka pari nga nadestino karon sa ilang parokya.

Sa reklamo sa atong texter, ingon sa nasagmuyo siya nganong sa ilang parokya gilabay kining pari nga kaniadto nalambigit sa kontrobersiya sa didto pa kini nadestino sa usa ka parokya sa south district sa dakbayan sa Sugbu.

Wala sila makauyon sa sinultihan ug linihokan sa maong pari. Diyotay na lang gani kuno ang manimba, kana kun ang atong texter nagsulti sa tinuod. Mora’g ang pinansiyal maoy gipasidak-an sa maong pari imbes ang espirituwal, matud sa atong texter.

Magsige kuno’g hisgot ang maong pari sa sibot nga gamay ray mo-offer. Manunglo pa gyud (kuno) ang maong pari. Mamalikas nga wala ba daw mangamatay ang mga tawo nga gamay ra man ang offer. Gibato na gani kuno ang maong pari sa mga tawo nga wala makauyon sa gibuhat ning paria.

“Unsaon man ni namo pagpetisyon aron maimbestigahan ni siya?” Nagkanayon ang atong texter sa iyang text nga akong nadawat niadtong Mayo 18, 2008 (sent: 02:43:59pm)

I-refer kini ninyo ngadto sa buhatan sa atong arsobispo sa artsidyosises sa Sugbu. Duna sila’y komitiba nga maka-imbestigar sa maong pari.

* * *

“Naa lang koy reklamo bahin sa akong gitrabahoan diris Mandaue. Almost 2 years na ming nagtrabaho sa usa ka forwarding company diri duol sa Cortes Hospital. Way klarong benipisyo, SSS, PhilHealth, ugbp. Hinaot maaksiyonan ni sa DOLE. Hinaot naay taga DOLE nga makabasa ining akong reklamo. Please, tabangi ming probeng trabahante.” -- 0916-6449533 (Sent:09:42”02pm-- May 21, 2008)

Dili igo nga magpaabot mo nga mabasahan sa taga DOLE ang inyong reklamo. Usahay ang maong buhatan dili makahimo sa ilang mandato pagsusi sa mga buhatan og establisamento nga wala magtuman sa mga lagda sa balaod sa pamuo. Busy? Tingali! Aw, ambot lang!

Labing maayo nga kamo mismo ang moadto sa buhatan sa DOLE aron ipahibalo kanila ang kahimtang sa inyong pagpanarbaho. Kana kun gusto gyud mo’g dinalian nga aksiyon. Pangunayi ninyo ang pagreklamo!

 (Sumbong ug reklamo? Text sa 0910-8105522).