Daghan nang mga anomaliya sa nagkadaiyang buhatan sa gobiyerno nga nabisto, nabulgar ug nahimong init nga kontrobersiya.
Ang nagbutyag niini mao ang gitawag og mga “whistleblower” nga gisakyan sab sa mga politiko.
Inighimo og exposé sa whistleblower, seguradong mabaniog gilayon ang usa ka anomaliya kay kuninitan man gyud dayon kini sa taga media.
Dili ta makabasol sa taga media kay igo lang silang nagtuman sa ilang trabaho paghatod og kasayoran ngadto sa publiko.
Ang ako lang gikahibudngan mao nga sa kadaghan na sa mga anomaliya nga gipangbisto, wala pa man gyuy usa sa mga naghimo niini nga nasilotan.
Morag kutob ra sa inquiry ang tanan!
Aron dunay mahisgotan sa media? Ambot lang!
Pila na ba ka exposé sa kahiwian ug anomaliya ang gihimo sa lainlaing personahe? May napriso na ba?
May mapriso ba gud kun kutob lang sa exposé ug inquiry ang tanan? Mora man gud og namolitika lang ang mga naghimo’g exposé. Ug ang maong exposé gipamolitika lang sab sa naghimog inquiry.
* * *
“Good day, Sir. Naa ko’y reklamo. Kana bang naninda og kandela sa simbahan sa Opon, nailad ko nila. Napugos ko’g dagkot unya mahal ra ba kaayo. Hinaot nga mabadlong ni.” -- 0929-2791381
Makadaghan na ko makadawat og reklamo mahitungod nianang mamaligyag kandela diha sa Opon nga mangilad (lagi kuno) sa mga managkotay.
Dili ba diay makabadlong ang mga tagdumala sa simbahan nianang mga mangingilad nga manindahay og kandela?
Akong sugyot ngadto sa mga managkotay nga mabiktima ning pipila ka badlongong manindahay og kandela diha sa Opon mao nga pagpadangat mo’g reklamo ngadto sa barangay aron matawag ang atensiyon sa maong mga candle vendors.
O ba kaha, mopadangat mo’g reklamo ngadto sa polis. Dili maayong pasagdan lang nato sila nga magpadayon paghimo’g tinonto.
* * *
(Sumbong ug reklamo? Text sa 0910-8105522).