Adunay mga public utility vehicles nga mokawat sa pagpamasahero sa rota nga wala mahilakip sa ilang prangkisa. Gitawag kini sila’g labyog. Mamasahero kini sila sa rota nga dili ilaha.
Kining mga "labyog" gireklamo sa mga driver nga mao gyo’y nagrota sa usa ka partikular nga dapit. Kusog man gud kaayong mangilog og pasahero kining mga labyog ug ang mga PUJ nga regular nga nagbiyahe sa usa ka partikular nga rota "maunggoyan" sa maong mga labyog.
Tambag nako sa mga pasahero mao nga ayaw mo’g sakay nianang mga labyog nga PUJ, multicab, minibus, bus ug uban pa. Kay kun simbako may mahitabong aksidente, dili mo makadawat og insurance.
* * *
"Good day. Diri sa Jaclupan, Talisay City mohangyo lang ko sa mga brgy. opisyal nga ila untang susihon ang matag sitio nga sakop sa barangay sama sa Sitio Tabuc Sapa. Ngitngit kaayo ang agianan diha gikan sa karsada paingon sa Tabuc. Wala gyo’y suga ang mga poste. Usa ni sa makaaghat og krimen" - - 0915-4495648 (Sent: 11:58:55am--October 28, 2008)
Lehitimo kining pagpakabana sa atong texter. Manghinaot tang mabasahan kini sa mga opisyal sa barangay Jaclupan, dakbayan sa Talisay ug ila kining mahatagan og konsiderasyon.
Tinuod baya nga ang kangitngit sa usa ka dapit usa sa maka-inspire sa mga daotang elemento sa paghimo og krimen. Busa, mas maayo gyod nga mabutangan og suga ang ngitngit nga mga dapit, labina gyod kun ang maong mga dapit agianan sa daghang mga tawo.
* * *
Ang problema sa illegal fishing lisod kaayong sumpoon sa hingpit. Kini tungod kay dili man sab seryoso ang mga awtoridad pagsumpo sa binuhatan sa mga mananagat nga naggamit og dinamita, cyanide ug uban pa, sa ilang pagkuha sa mga isda sa atong kadagatan.
Sa Bohol gani, baniog kaayo nga may usa ka taas nga opisyal sa usa ka lungsod nga magdawatan og suborno gikan sa illegal fishers. Kun ingon niini ang sitwasyon, lisod gyod sumpoon ang mga mananagat nga naghimo’g illegal nga pagpanagat.
* * *
(Sumbong ug reklamo? Text sa 0910-8105522).